Шығыс Қазақстан тауларында фототұзаққа сирек кадр түсіп қалды. Қар барысы үш күшігімен бірге түсірілген. Видео Қатон-Қарағай ұлттық паркі аумағында түсірілген, деп хабарлайды Ulysmedia.kz.
ТОЛЫҒЫРАҚ
Мамандардың айтуынша, мұндай көріністер өте сирек болады. Қар барысының күшіктері шамамен екі жыл бойы анасының жанында жүреді: осы кезеңде олар аң аулауды, тауда қозғалу тәсілдерін және жабайы табиғатта тіршілік етуді үйренеді. Ұлттық парк әкімшілігі аналық барыстың бірден үш күшігімен көрінуі тіршілік ету жағдайының қолайлы екенін және экожүйенің тұрақты күйде екенін білдіретінін атап өтті. Бұл — ғалымдар мен экологтар үшін маңызды белгі. Қар барысы Қызыл кітапқа енгізілген және ең осал жыртқыштардың бірі саналады.
АЛМАТЫДАҒЫ БАРЫС
Бұған дейін сирек жыртқыштың Үлкен Алматы шатқалы маңындағы жол бойында байқалғаны хабарланған еді. Туристер қауіпсіздік талаптарын бұзып, оны қоршап алған. Жануарды да, адамдарды да қорғау үшін мамандар барысқа уақытша спутниктік қарғыбау таққан.
