Қазақстандық спортшылар Италияда өтіп жатқан қысқы Олимпиада ойындарындағы жарыстарын жалғастырады. 16 ақпанда ел намысын спорттың үш түрінен өкілдер қорғайды, деп хабарлайды Ulysmedia.kz.
Кімдер жарысқа шығады
2026 жылғы Қысқы Олимпиада ойындары аясында 16 ақпанға жоспарланған қазақстандық спортшылардың жарыс кестесі белгілі болды. Олимпиадалық бағдарламаның едәуір бөлігі артта қалғанына қарамастан, Қазақстан құрамасы жоғары орындар үшін күресті жалғастырып отыр. Дүйсенбі күні ел намысын бес спортшы қорғайды, олар спорттың үш түрі бойынша сынға түседі. Солардың қатарында ойындардың ашылу салтанатында туды алып шыққан спортшы Денис Никиша да бар.
ҰОК-тен ақпарат
Қазақстанның Ұлттық олимпиадалық комитет мәліметінше, қатысушылар құрамы мен старт тәртібі бекітілген, ал барлық жарыс күннің ресми олимпиадалық бағдарламасы аясында өтеді. Жанкүйерлер қазақстандық спортшылардың өнерін тікелей эфирде тамашалай алады.
Трансляцияны қайдан көруге болады
Қазақстан құрамасының қатысуымен өтетін жарыстардың телетрансляциялары мына телеарналардан көрсетіледі: Qazaqstan; Qazsport; «Хабар»; Jibek Joly.
Алдыңғы жарыс күнінің қорытындысы бойынша Қазақстан құрамасы жалпы медальдық есепте 15-орыннан 17-орынға төмендеді. Команданың еншісінде әзірге бір ғана жүлде бар — мәнерлеп сырғанаушы Михаил Шайдоров жеңіп алған алтын медаль. Бұл жүлде ел тарихындағы маңызды жетістік ретінде тіркелді.
