Баспасөз бостандығын қорғаумен айналысатын ұйымның мәлімдеуінше, бақылау жүргізіле бастаған уақыттан бері журналистерді ең көп өлтірген ел — Израиль, деп хабарлайды Ulysmedia.kz.
ТОЛЫҒЫРАҚ
Журналистерді қорғау комитеті (CPJ) дерегіне сүйенсек, Al Jazeera мәліметінше, 2025 жылы әлемде 129 медиа қызметкері қаза тапқан. Бұл — ұйым 1992 жылдан бері статистика жүргізе бастағалы бергі ең жоғары көрсеткіш. CPJ мәліметінше, олардың 84-і Израильдің әрекеттеріне байланысты көз жұмған.
Сәрсенбі күні жарияланған жылдық есепте израильдік әскерилер тарапынан БАҚ-қа жасалған шабуылдар үшін «жүйелі жазасыздық» бар екені айтылған. Ұйым дерегінше, 2025 жылы қаза тапқан журналистердің үштен екісінен астамы Израильдің әрекеттерімен байланысты. Құрбандардың басым бөлігі — палестиналық журналистер.
Сонымен қатар, CPJ мәліметіне сәйкес, Израильдің әуе соққыларынан Йемендегі газеттерде жұмыс істеген 31 қызметкер қаза тапқан. Ұйым Израильді журналистерді нысаналы түрде өлтіру фактілерінің басым бөлігі үшін жауапты деп санайды. 2025 жылы әлем бойынша тіркелген осындай 47 жағдайдың 38-і, CPJ пайымынша, Израильмен байланысты.
Есепте статистика жүргізіле бастағалы бері бірде-бір үкіметтің журналистерді мұншалықты көп өлтірмегені айтылады. Сонымен қатар, CPJ нақты сандар бұдан да жоғары болуы мүмкін екенін ескертеді. Баяндаманы әзірлеген авторлардың пікірінше, Газадағы баспасөз жұмысына қойылған шектеулер мен күрделі гуманитарлық жағдай оқиғаларды тергеуді қиындатып отыр, ал кейбір дәлелдер жойылып кетуі ықтимал.
2022 жылы Батыс жағалауда қаза тапқан «Al Jazeera» журналисі Ширин Абу Акленің құрметіне аталған Shireen.ps сайтының дерегінше, Израильдің Газадағы соғысы басталғалы бері 300-ге жуық медиа қызметкері мерт болған. Израиль кейбір журналистердің қаза тапқанын мойындағанымен, оларды қарулы топтармен байланысы бар деп мәлімдеген. Ал қаза тапқандардың жұмыс берушілері мен CPJ бұл айыптауларды жоққа шығарып, оны қауіпті қаралау деп бағалайды.
ТАҒЫ ҚАЙ ЕЛДЕР
Газа мен Йеменнен тыс, 2025 жылы журналистер өлімі ең көп тіркелген елдер — азаматтық соғыс жалғасып жатқан Судан және ұйымдасқан қылмысқа байланысты зорлық-зомбылық деңгейі жоғары Мексика. Суданда тоғыз журналист, Мексикада алты журналист қаза тапқан. Сондай-ақ есепке сәйкес, ресейлік әскерилердің шабуылдары салдарынан төрт украиналық журналист көз жұмған.
