Атырау облысының мамандандырылған ауданаралық қылмыстық соты 82 жастағы Тыныштық Қарасаеваны өлтіру ісі бойынша шешім шығарды. Марқұм Қызылқоға ауданында тұрған, деп хабарлайды Ulysmedia.kz.
ІСТІҢ МӘН-ЖАЙЫ
Сот анықтағандай, келін төсекке таңылған қарт әйелдің бас тұсына бес рет пышақ сұққан. Алған жарақаттарының салдарынан зейнеткер оқиға орнында көз жұмған.
Іс материалдарына сәйкес, қылмыс куәгерлердің айғақтарымен, сараптама қорытындыларымен және зерттелген дәлелдермен расталған.
Шешуші дәлел — психиатриялық сараптама қорытындысы болды. Онда сотталушының созылмалы психикалық ауру — параноидты шизофренияға шалдыққаны көрсетілген. Сараптамаға сәйкес, оқиға кезінде ол өз әрекетінің мәнін түсінбеген.
Айыпталушының бес кәмелетке толмаған баласы бар. Үлкені – 10 жаста, кішісі – 1 жаста. Әйелдің әкесі оны Атырауда емдеуде қалдыруды сұрағанымен, сот диагнозын ескере отырып, оның айналасындағылар үшін қауіпті болуы мүмкін екенін атап өтті.
Сот әйелді қылмыстық жауапкершіліктен босатып, оған медициналық сипаттағы мәжбүрлеу шараларын қолданды. Ол Ақтас қаласындағы мамандандырылған медициналық мекемеге емделуге жіберілді.
