Қонаев қаласының әкімдігі 150 мың гектар жерді заңсыз берген, деп хабарлайды Ulysmedia.
Мән-жай
Сот Қонаев қаласының әкімдігі заң талаптарын бұзып берген 150 мың гектар жер телімін мемлекет меншігіне қайтару туралы шешім шығарды. Аталған аумақ бұған дейін тұрғын үй және ойын-сауық кешенін, соның ішінде зообақ салу мақсатында бөлінген. Алайда жүргізілген тексеріс нәтижесінде жерді беру кезінде жер заңнамасының талаптары сақталмағаны анықталған.
Алматы облысының жер ресурстарын басқару департаменті Қонаев қаласы әкімдігінің қызметіне жоспардан тыс тексеріс жүргізген. Тексеріс жер телімін беру заңдылығына қатысты туындаған күмәндарға байланысты басталған.
Нәтижесінде, жалпы аумағы 150 мың гектар жер телімі тұрғын үй және ойын-сауық кешенін, оның ішінде зообақ салу үшін берілгені анықталған. Алайда бұл шешім жер кодексінің талаптарына қайшы келген, өйткені жер телімін бөлу қаланың бас жоспарына сәйкес келмеген.
Департамент әкімдікке заңбұзушылықтарды жою жөнінде нұсқама бергенімен, жергілікті билік оны орындамаған.
«Осыған байланысты прокуратура Қонаев қаласының сотына жүгінді. Сот процесіне Жер ресурстарын басқару департаментінің өкілдері үшінші тарап ретінде қатысып, анықталған заңбұзушылықтар жөнінде сотқа түсіндірме берді», – делінген департамент хабарламасында.
Сот прокуратура талаптарын толықтай қанағаттандырған. Жер телімі мемлекет меншігіне қайтарылған.
