Батыс Қазақстан облысында 7,2 млрд теңге сомасына мемлекеттік сатып алу конкурстарының күші жойылды, деп хабарлайды Ulysmedia.kz.
ТОЛЫҒЫРАҚ
Бөрлі ауданында жалпы сомасы 7,2 млрд теңгеден астам мемлекеттік сатып алуларды жою арқылы 826,3 млн теңге сомасында бюджет қаражатының негізсіз жұмсалуына жол берілмеді.
21 қаңтарда мемлекеттік сатып алулар порталында Бөрлі ауданы әкімі аппаратымен БҚО, Бөрлі ауданы, Ақсай қаласындағы автомобиль жолдарын күтіп-ұстау және ағымдағы жөндеу бойынша (Оңтүстік және Солтүстік бөліктері, сондай-ақ Қызылтал ш/а) жалпы сомасы 7,2 млрд теңгеге мемлекеттік сатып алулар жарияланған.
Аталған жұмыстардың құрамында көгалдандыру (көгал отырғызу, ағаштар мен гүлдер егу және оларды күтіп-баптау) көзделгенімен конкурс құжаттамасы «Өсімдіктер дүниесі туралы» Заңның міндетті талаптарына сәйкес келмегені анықталды, атап айтқанда, жоспарланған отырғызулар мен көгалдар жасауға қатысты дендрологиялық жоспар және көгалдандыру жұмыстарының көлемі мен құнын айқындау үшін қажетті дефектілік акт болмаған.
Сонымен қатар, көгалдандыру жұмыстары жеке лот ретінде бөлінбеген, ал жұмыстарды орындау учаскелері мен нақты мекенжайлары құжаттамада нақтыланбаған.
Есептеулерге сәйкес аталған іс-шараларға 826,3 млн теңге қаражат қарастырылған.
Атап өту қажет, дендрологиялық жоспар көгалдандыруды жоспарлаудың негізі болып табылады, онда қолданыстағы жасыл қорды, түрлік құрамды және орналастыруды ескере отырып, отырғызуға немесе күтім жасауға жататын өсімдіктердің саны көрсетіледі. Мұндай жоспарлар болмаған жағдайда жоспарланған отырғызулардың қажеттілігін, отырғызылатын тұқымдардың негізділігін және жұмыстардың нақты учаскелерге байланысын растау мүмкін емес.
Анықталған бұзушылықтар жұмыстардың көлемін негізсіз айқындауға, сатып алудың ашықтығын төмендетуге және бюджет қаражатын тиімсіз жұмсауға, оның ішінде тиісті бастапқы құжаттарсыз және нақты учаскелерге байланыссыз жұмыстарға ақы төлеу тәуекелдеріне жағдай жасаған.
Прокурорлық қадағалау актісі бойынша мемлекеттік сатып алулардың күші жойылып, нәтижесінде негізсіз жалпы сомасы 826,3 млн теңге сомасында бюджет қаражатының жұмсалуына жол берілмеді.
