Қазақстанда пияз бағасы ең төмен деңгейге түсті, алайда фермерлер шығынға батып жатыр. Салдарынан келесі маусымда пияз қымбаттауы мүмкін, деп хабарлайды Ulysmedia.kz.
ТОЛЫҒЫРАҚ
Қазақстандық шаруалар күтпеген дағдарысқа тап болды: ең көп өсірілетін көкөністердің бірі пияз нарықта сұраныссыз қалды. Бұл туралы “31 канал” хабарлады. Жиналған өнім қоймаларда үйіліп, бұзылып, шіріп жатыр және өндірушілерді шығынға батыра бастады. Мұндай жағдай фермерлердің қазіргі табысына ғана емес, алдағы ауыл шаруашылығы маусымына да әсер етуі мүмкін.
ПИЯЗ ӨТПЕЙ ЖАТЫР
Шаруалардың айтуынша, қазіргі уақытта пияздың бір келісі небәрі 30 теңгеден сатылып жатыр. Соған қарамастан, мұндай төмен бағаға да сұраныс аз.
- Нарық шамадан тыс толып кеткен, ал ірі сауда желілеріне шығу мен экспортқа жол табу көптеген өндіруші үшін қиын болып отыр. Соның салдарынан өнімнің бір бөлігі қоймаларда шіріп, оған кеткен егіс, жинау және сақтау шығындары да ақталмай жатыр, – деп хабарлайды телеарна.
Шаруа Сырғабай Мерлисовтың айтуынша, саладағы табыс күрт азайған, кей жағдайда өндіріс тіпті өзін ақтамайтын деңгейге жеткен. Ал шығындар керісінше өсіп жатыр, тұқым, жанармай және жұмыс күші қымбаттап жатыр.
БҰЛ НЕГЕ ҚАЙТАЛАНА БЕРЕДІ?
Сарапшылар мұндай жағдай Қазақстан үшін жаңалық емес екенін айтады.
- Пиязға қатысты мәселе жыл сайын қайталанады: бірде нарықта тапшылық болып, баға шарықтайды, енді бірде фермерлер жаппай осы дақылды егеді де, артынша елде артық өнім пайда болады, – дейді аграрлық сарапшы Кирилл Павлов.
Оның сөзінше, жүйелі реттеудің жоқтығы осындай теңгерімсіздікке әкеледі. Баға көтерілген кезде фермерлер егіс көлемін ұлғайтады, ал келесі маусымда нарық шамадан тыс толып кетеді.
ЖҮЙЕ
Мамандар мәселе тек өндіріс көлемінде емес, өнімді өткізу жүйесінде де екенін атап өтеді.
- Егер өнім экспортқа шықпай жатса, демек оның бәсекеге қабілеті төмен. Қазақстан ішінде сауда желілері мен көтерме сатып алушылар жергілікті өндірушілермен жұмыс істеуге дайын, бірақ шешуші фактор бәрібір баға болып қала береді, – дейді Сауда және интеграция министрлігі өкілдері.
Сарапшылардың пікірінше, мұндай мәселелерді егіс науқаны басталмай тұрып алдын ала шешу қажет. Ол үшін Ауыл шаруашылығы министрлігі, Сауда және интеграция министрлігі және Көлік министрлігі арасында үйлесімді жұмыс болуы тиіс.
Тек жүйелі тәсіл арқылы ғана мол өнімнің шығынға айналуына жол бермеуге болады. Фермерлер қазірдің өзінде ескертіп отыр: пияз өсіру тиімсіз болып барады. Бұл келесі маусымда егіс көлемінің қысқаруына, соның салдарынан қайтадан тапшылық пен бағаның өсуіне әкелуі мүмкін.
