АҚШ президенті Дональд Трамп Ақ үйде Нидерланд королі Виллем-Александр мен ханшайым Максима құрметіне берілген кешкі ас барысында Ирандағы соғысты мүмкіндігінше тез аяқтағысы келетінін мәлімдеді, деп хабарлайды Ulysmedia.kz.
ТРАМПТЫҢ ҰСТАНЫМЫ
Америкалық шенеуніктерге сілтеме жасаған The Wall Street Journal-дың жазуынша, Трамп Тегеранды келіссөз үстеліне қайтарудың жалғыз жолы — қысымды күшейту деп есептейді. Бұл ұстанымды ол Нидерланд тарапы мен ресми тұлғаларға түсіндірген.
Бұған дейін Нидерланд үкіметі Иран порттарын бұғаттау бастамасына қолдау көрсетуден бас тартқан. Елдің премьер-министрі Роб Йеттен Ақ үй басшысына Еуропа одақтастары Ормуз бұғазы қауіпсіздігін қамтамасыз ету үшін халықаралық коалиция құруға дайын екенін, алайда бұл тек әскери қимылдар аяқталғаннан кейін мүмкін болатынын жеткізген. Йеттеннің айтуынша, кешкі ас «бір-бірін толық иландыруға жеткіліксіз, бірақ ұстанымдарды жақсырақ түсінуге мүмкіндік берген».
БЛОКАДАҒА КІМДЕР ҚАТЫСАДЫ?
WSJ жазуынша, Трамп блокадаға қатысатын «басқа елдерді» жариялайтынын айтқанымен, нақты ешбір мемлекет бастама көтермеген, тіпті бірқатары одан бас тартқан. Бірнеше күн өтсе де, қатысушы елдердің тізімі ұсынылмаған.
Соған қарамастан, Ақ үйдің баспасөз хатшысы Кэролайн Левитт блокада өзге елдердің көмегінсіз-ақ «мінсіз жүргізіліп жатқанын» мәлімдеді. Оның сөзінше, АҚШ-та әлемдегі ең қуатты әскери-теңіз флоты бар, ал Иран флотының мүмкіндігі шектеулі.
АҚШ-ТЫҢ ТАЛАБЫ
Трамп Ираннан байытылған уранды тапсыруды және кемінде 20 жыл бойы оны байытуды тоқтатуға міндеттеме алуды талап етіп отыр. Ал Тегеран бұған жауап ретінде бес жылдық мерзім ұсынып, уранның ел аумағында қалуын қалайды.
Ақ үй басшысы соғыстың жуық арада аяқталатынын айтқанымен, бірқатар шенеунік пен сарапшылар Иранға блокаданың нақты экономикалық әсерін сезіну үшін бірнеше ай немесе одан да ұзақ уақыт қажет болуы мүмкін деп санайды. Республикалық партия өкілі көмекшілеріне блокаданың қанша уақыт қажет болса, сонша жалғасуына қарсы еместігін, бірақ Тегеран келісімге жақын деп есептейтінін жеткізген.
Жоғары лауазымды америкалық шенеунік WSJ-ға АҚШ әскери-теңіз күштері блокаданы ұзақ уақыт ұстап тұра алатынын айтқан. Алайда Пентагон бұл жағдай әскери кемелерге қосымша салмақ түсіріп, АҚШ-тың өзге аймақтардағы, әсіресе Тынық мұхиты өңіріндегі әскери қатысуын әлсіретуі мүмкін деп алаңдайды.
