Қазақстан өз аумағы арқылы Ресей мұнайын Қытайға тасымалдаудан түсетін кірісті арттырады. Бұл туралы энергетика министрі Ерлан Ақкенженов мәлімдеді, деп хабарлайды Ulysmedia.kz.
Қазақстан үшін пайда
Министрдің айтуынша, Ресей мұнайының транзит көлемін ұлғайту жөніндегі келісім Қазақстанға қосымша табыс әкеледі. Келісім Ресей президенті Владимир Путиннің Астанаға мемлекеттік сапары аясында жасалған.
— Кеше Ресей мұнайын Қытайға тасымалдау көлемін арттыру туралы келісімге қол қойылды. Бұл жеткізу көлемін ұлғайтуға мүмкіндік береді және соның нәтижесінде Қазақстан транзиттен қосымша табыс табады, — деді Ерлан Ақкенженов.
ЕАЭО аясындағы ынтымақтастық
Министр Қазақстанның Еуразиялық экономикалық одақ (ЕАЭО) шеңберіндегі энергетикалық интеграцияны күшейтуге ниетті екенін де атап өтті.
— Қазір әлемде интеграциялық үдерістер жүріп жатыр, Қазақстан да одан тыс емес. Энергетика саласында бұл өте маңызды, біз көрші елдермен тарихи байланыстарды ескереміз, — деді ол.
Бұған дейін Қазақстан мен Ресей мұнай транзитін 10 млн тоннадан 12,5 млн тоннаға дейін арттыруға келіскені хабарланған. Сондай-ақ 2025 жылдың қыркүйегінде Ресей мен Қытай «Атасу – Алашанькоу» құбыры арқылы мұнай экспортын көбейтуге уағдаласқан.
