Түркістан облысында жүргізуші үйдің ауласына көлікпен кіріп кетіп, салдарынан үш адам қаза тапты, олардың арасында екі бала бар, деп хабарлайды Ulysmedia.kz.
Айдаровтар отбасы бір күнде келінінен және кішкентай немересінен айырылды. Туыстарының айтуынша, қайғылы оқиға санаулы секунд ішінде болған.
Үйдің ауласында 30 жастағы Айшолпан көршісімен және балалармен бірге отырған кезде жоғары жылдамдықпен келген көлік кірпіш қоршауды бұзып өткен. Соққыдан кейін көлік аула ішіне кіріп кеткен. Оқиға салдарынан алты адам көлік астында қалған.
– Біздің кішкентай баланы жердің астынан тапты. Келініміз соққыдан сарайға ұшып кеткен. Соққы өте қатты болды. Жүргізуші мүлде тежеуішті баспаған. Полицейлер келгенде тежелу іздері де болмаған, – дейді қаза тапқандардың туысы Ғани Айдаров.
Көлікті 52 жастағы әйел басқарған. Ол мас болған және апаттан кейін қашып кетуге тырысқан.
Туыстарының айтуынша, ең қиыны, қайғылы оқиғаның балалардың көз алдында болғаны.
– Мен келгенде олар «анасы есінен танып қалды» деп айтты. Олар кішкентай болса да, бәрін өз көздерімен көрген. Тіпті әлі сөйлей алмайтын бала да маған жүгіріп келді. Мұндай қайғы балалардың көз алдында болды, – дейді Раушан Айдарова.
Қаза болғандар мен зардап шеккендер
Айшолпан ауруханаға бара жатқан жолда көз жұмды. Оның екі жасар ұлы мен көршісінің бес жасар қызы оқиға орнында қаза тапқан.
Қаза болған қыздың анасы мен оның бір жарым жастағы ұлы аман қалған.
Қазіргі уақытта олар ауруханада жатыр. Тағы бір зардап шеккен адамға амбулаториялық ем тағайындалған.
Ауруханадағы жағдай
Дәрігерлердің айтуынша, бір жарым жасар бала ауыр халде реанимацияда жатыр. Оның миы шайқалып, бірнеше қабырғасы мен сан сүйегі сынған.
30 жастағы тағы бір әйел де ауруханада. Оның жағдайы орташа ауыр деп бағалануда.
Айшолпан мен зардап шеккен көршісі балабақшада тәрбиеші болып жұмыс істегені белгілі болды. Жүргізуші қазір қамауда. Ол мектепте қазақ тілі пәнінің мұғалімі болып жұмыс істейді және бос уақытында жолаушы тасымалымен айналысқан.
Жергілікті тұрғындардың айтуынша, оны бұрын да мас күйде көргендер болған. Сондай-ақ ол сол түні полициядан қашуға тырысқан болуы мүмкін деген ақпарат бар.
Қазіргі уақытта полиция оқиғаның мән-жайын анықтап жатыр. Аталған факті бойынша қылмыстық іс қозғалған.
Назерке Еркінбекқызы
