Қазақстандағы ең арзан баспана қай қалада

БАСТАПҚЫ НАРЫҚ

Ұлттық статистика бюросының маусым айындағы мәліметіне қарағанда, елімізде жаңа тұрғын үйдің 1 шаршы метрінің орташа бағасы – 617,5 мың теңге.

Ең қымбат жаңа пәтерлер Астанада сатылып жатыр. Мұнда 1 шаршы метрдің бағасы – 739 мың теңге. Екінші орында Алматы – шамамен 726 мың теңге.

Ал ең арзан жаңа тұрғын үй Оралда тіркелді. Мұнда 1 шаршы метрдің бағасы – небәрі 327 мың теңге, яғни мегаполистермен салыстырғанда екі еседен де арзан.

Сондай-ақ жаңа баспананың бағасы төмен қалалар қатарына:

• Ақтөбе – 356,4 мың теңге;
• Көкшетау – 370,1 мың теңге;
• Қызылорда – 392,3 мың теңге кірді.

ҚАЙТАЛАМА НАРЫҚ

Қайталама тұрғын үй нарығында Алматы Астананы басып озды. Оңтүстік мегаполисте ескі тұрғын үйдің 1 шаршы метрі 749,5 мың теңге болса, Астанада – 727,3 мың теңге. Бұл – елдегі ең жоғары көрсеткіштер.

Қазақстан бойынша қайталама нарықтағы тұрғын үйдің орташа бағасы – 629,6 мың теңге.

Ең арзан қайталама тұрғын үй Қызылордада тіркелді. Мұнда 1 шаршы метрдің бағасы – 342,7 мың теңге.

Сондай-ақ төмен баға:

• Таразда – 351,6 мың теңге;
• Ақтауда – 360,2 мың теңге;
• Ақтөбеде – 369 мың теңге.

Сарапшылардың мәліметінше, Ақтөбе, Орал және бірқатар басқа қалаларда қайталама нарықтағы пәтерлердің бағасы жаңа тұрғын үйлерден жоғары. Ал Көкшетау мен Түркістанда жаңа және ескі баспананың бағасы бір-біріне өте жақын.

ПӘТЕРДІ ЖАЛҒА АЛУ

Жалдау бағасы бойынша көш басында Алматы мен Астана тұр.

• Алматыда 1 шаршы метрді жалдау құны – 5,9 мың теңгеге жуық;
• Астанада – 5,6 мың теңге.

Ал пәтерді ең арзан жалға алуға болатын қала – Тараз. Мұнда 1 шаршы метрдің орташа жалдау құны 2,5 мың теңгені құрайды.