Демократиялық партия жетекшісі Жанболат Мамайдың жаппай тәртіпсіздікті ұйымдастыру және басқа да айыптар бойынша ісін қарау жалғасуда. Бұл жолы Мамайдың қорғаушысы судьяға қарсы шықты, деп хабарлайды Ulysmedia.kz.
“Бүгін Жанболат Мамай ісі бойынша сот процесі өтті. Сотта бірнеше куәгер шақырылды. Олардың барлығы Жанболаттың Қаңтар оқиғасында халықты заң бұзбауға шақырғанын, тек қана бейбіт түрде наразылық танытуға шақырғанын айтты. Арасында «Алматы Арена» маңында болған митингті өз көзімен көрген «Власть» интернет журналының журналисі Ольга Логинова да болды. Сот өте эмоционалды түрде өтті. Әсіресе, прокурор Баймағанбетовтың өз-өзін ұстауы, куәгер Логиноваға «вам память отшибла?» деп дөрекі сөйлегеніне Жанболаттың қорғаушылары наразылық танытты. Жанболат Мамайдың өзі прокурорға қарата «тапсырма орындап отырғаныңды білемін, бірақ сонша өшпенділік танытуыңа жол болсын» деп орнына қойды”, – деп жазды Мамайдың жары, белсенді Инга Иманбай жеке парақшасына.
Оның сөзіне қарағанда, соттың аяғына қарай Жанболаттың қорғаушысы сотқа сенімсіздік танытқан. Себебі, ол бұрын процесте бақылаушы болған адамдарды куә ретінде сұраудан бас тартты. Ал олардың арасында белгілі саясаткер Төлеген Жүкеев пен Демпартия бастамашыл тобының мүшесі Дәурен Достияров та бар. Олар өте маңызды мәлімет бере алатын куәгерлер. Себебі, дәл сол «Алматы Арена» маңында болған оқиғаларды бастан аяқ көзімен көрген, құлағымен естіген.
“Бұл жағдайды Бостандық ауданы сотының төрағасы қарады. Ол тіпті қорғаушыға өз ұстанымын қағаз жүзінде жазуға уақыт беруден бас тартып, апыл-ғұпыл қарап, қорғаушының өтінішін қанағаттандырмады. Ендігі сот процесі дүйсенбі, 13 ақпан күні, сағат 10-00 жалғасады.
Билік барлық халықаралық қауымдастықтың мәлімдемесін, Жанболаттың жазықсыз екенін айтқанын тыңдамай, қатал үкім шығарған жағдайда, Демпартия жетекшісінің бостандығы үшін күрес жалғаса береді!”, – деп ескертті автор.
Еске салайық, Мамай 2022 жылдың ақпанында қаңтар оқиғасы кезінде қаза тапқандарды еске алу акциясынан кейін бірден қамауға алынған болатын. Содан бері қамауға алу мерзімі бірнеше рет ұзартылды. Қараша айында белсендіге қасақана жалған ақпарат таратқан, мемлекеттік қызметкерді балағаттап, тәртіп бұзған, бейбіт жиналыстар ұйымдастырып, өткізген деген айып тағылған. Сот отырысында Мамай өз кінәсін мойындамайтынын және өзінің кінәсіз екенін дәлелдейтінін мәлімдеді.
2023 жылдың 26 қаңтарында Мамайға қаңтар оқиғасын ұйымдастырды деп тағы да айып тағылғаны белгілі болды.
Ulysmedia.kz журналистері бір жылдан бері Мамай ісін қадағалап, саясаткердің төңірегіндегі оқиғалардың қалай өрбігенін айтып жатыр. Инга Иманбай үйқамақта қалай өмір сүретінін, соттан не күтетінін айтты.
Бұған дейін Иманбай парламенттік сайлауға қатысуға ниетті екенін мәлімдеген.
Қазақстанда қаңтар айында Жаңаөзендегі газ бағасының көтерілуіне қарсы наразылықтар басталған ауқымды тәртіпсіздіктер болды. Олардың жолын кесу үшін Президент Қасым-Жомарт Тоқаев, атап айтқанда, ҰҚШҰ елдерінің Қарулы Күштерін шақырды. Қазақстан билігі тәртіпсіздіктерге «лаңкестерді» айыптады. Қаңтар оқиғасының құрбандары 238 адам болды. Кейіннен Назарбаевқа жақын көптеген адамдар әртүрлі айыптармен қызметтерінен босатылды немесе қамауға алынды.
