Қазақстан қор биржасында алдыңғы аптада АҚШ долларының бағасы 463,97 теңгеге дейін төмендеді. Сарапшылардың айтуынша, алдағы күндері ұлттық валютаға ел ішіндегі бірқатар фактор қосымша қолдау көрсетуі мүмкін, деп хабарлайды Ulysmedia.kz.
Экспорттаушылар теңгеге қолдау көрсетеді
Жұма күні Қазақстан қор биржасында доллар 1,07 теңге арзандап, сауда сессиясын 463,97 теңге бағамымен аяқтады. Бір күнде нарық қатысушылары 310,2 млн долларға мәміле жасады.
Қазақстан қаржыгерлер қауымдастығы теңгенің нығаюын бірнеше факторымен байланыстырады. Мұнай қымбаттады, әлемдік нарықта доллар аздап әлсіреді, ал Қазақстанда тоқсандық салық кезеңі жақындап келеді.
Ірі экспорттаушыларға салық төлеу үшін теңге қажет. Сондықтан олар валюталық түсімдерінің бір бөлігін теңгеге айырбастап жатыр. Нарықтағы долларға ұсынысты Ұлттық банк те арттырды. Ол шетел валютасын сатуды көбейтті.
Осы аптада нарық Қазақстанның сыртқы саудасы, инвестициялары және ақша массасына қатысты деректерді бақылайды.
Мұнай – 88 доллар
Бұл ретте мұнай бағасы 2,2%-ға өсті. Бір баррель мұнай шамамен 88,5 доллардан сатылып жатыр. Бағаның өсуіне Иран төңірегіндегі шиеленістің күшеюі әсер етті. АҚШ Иран порттарын әскери-теңіз блокадасында ұстауды жалғастыруға ниетті екенін аңғартты.
Иранның сыртқы істер министрі Аббас Арагчи Тегеранның Вашингтонмен келіссөздерді қайта бастау туралы әзірге шешім қабылдамағанын мәлімдеді. Таяу Шығыстағы белгісіздік алтын бағасына да өсірді. Оның бағасы трой унциясына 4 437 долларға дейін көтерілді.
Енді орталық банктер не шешеді?
Әлемдік нарықтар үшін бұл апта маңызды жаңалықтарға толы болмақ. Инвесторлар АҚШ Федералдық резерв жүйесінің соңғы отырысының хаттамасын күтіп отыр. Нарық қатысушылары осы құжат арқылы америкалық пайыздық мөлшерлемелердің алдағы бағытын бағалауға тырысады.
Еуропада Еуропалық орталық банктің отырыс хаттамасы және инфляцияға қатысты жаңа деректер жарияланады.
Қытай Халық банкі базалық мөлшерлеме бойынша шешім қабылдайды. Ал Жапониядан жалпы ішкі өнім, инфляция және сыртқы саудаға қатысты мәліметтер келеді.
Америкалық қор индекстері аптаны аздап төмендеумен бастады. Жұма күні олар шамамен 0,2-0,3%-ға төмендеді. Бұған бөлшек сауда және тұтынушылардың көңіл-күйі туралы жаңа деректердің көңіл көншітпеуі себеп болды.
Сондықтан алдағы күндері теңге бағамына тек Қазақстандағы жағдай ғана әсер етпейді. Ұлттық валютаға мұнай бағасы, әлемдегі ірі орталық банктердің шешімдері және Иран төңірегіндегі қақтығыстың одан әрі өрбуі ықпал етуі мүмкін.
