Алматының Бостандық ауданы №2 соты Orda басылымының тең құрылтайшысы Гүлнәр Бажкеноваға қатысты үкім шығарды. Ол сегіз жылға бас бостандығынан айырылды. 14 жасқа толмаған баласы бар болғандықтан, жазаны орындау екі жылға кейінге қалдырылды. Бажкенова сеніп тапсырылған мүлікті иемдену немесе ысырап ету, заңсыз кәсіпкерлік және көрінеу жалған ақпарат тарату баптары бойынша кінәлі деп танылды, деп хабарлайды Ulysmedia.kz.
Мән-жай
Сот анықтағандай, 2024 жылғы қарашадан 2025 жылғы желтоқсанға дейін Бажкенова компанияны басқарған кезде оның шоттарынан 88,1 миллион теңгеден астам қаражатты жымқырған. Сот материалдарына сәйкес, ақша өзі бақылауындағы жеке кәсіпкердің есепшотына жарнамалық, кәсіби және ғылыми қызметтер үшін төлем ретінде аударылған. Компания қаражаты есебінен Бажкенованың ұлының жекеменшік халықаралық мектепте оқу ақысы да төленген.
Тағы бір эпизод жылжымайтын мүлікке қатысты болған. Сот журналистің кәсіпкер ретінде тіркелмегеніне қарамастан, Алматыдағы пәтерлерді сатып алып, қайта сату арқылы 121,2 миллион теңге табыс тапқанын анықтады. Бұл табыстан салық төленбеген.
Жалған ақпаратқа қатысты сегіз эпизод
Orda жарияланымдарына қатысты сот Гүлнәр Бажкенова 2024-2025 жылдары интернет пен әлеуметтік желілер арқылы көрінеу жалған ақпаратты сегіз рет таратқан деген қорытындыға келген.
Сот материалдарында оның алдын ала сөз байласқан адамдар тобымен әрекет еткені, ал жарияланымдардың азаматтарға, ұйымдар мен мемлекетке айтарлықтай зиян келтіргені айтылған.
Сот отырыстарының бірінде Алматы прокурорының орынбасары ұсталды деген ақпаратқа қатысты жарияланым талқыланды. Orda тең құрылтайшысы Мақсат Ғаниевтің айтуынша, Бас прокуратура мен Антикор бұл ақпаратты жоққа шығарған. Алайда жаңалық басылымның сайтында және YouTube-арнасында жарияланған.
Бес жыл журналистикамен айналысуға тыйым салынды
Сегіз жылға бас бостандығынан айыру жазасынан бөлек, сот Бажкеноваға бес жыл бойы БАҚ саласында жұмыс істеуге, журналистикамен, блогингпен, қоғамдық және өзге де қоғамдық қызметпен айналысуға тыйым салды.
Сондай-ақ оған БАҚ-қа қатысты ұйымдарда басшылық және материалдық жауапты лауазымдарды атқара алмайды.
Бажкеновадан материалдық шығынды өтеу үшін шамамен 96 миллион теңге, 2,9 миллион теңгеге жуық мемлекеттік баж және жәбірленуші тараптың заң көмегі мен процестік шығындары үшін тағы 6,8 миллион теңге өндірілді.
Соттың соңғы отырысы шиеленіске толы болды
Процестің соңғы отырысы шиеленісті жағдайда өтті. Қорғаушы Елдар Мұсаевтың сот отырысын басқа күнге ауыстыру туралы өтінішін судья Елена Кван қанағаттандырмады.
Медициналық қорытындыға сәйкес, Бажкенова сот отырысына қатысып, сөйлеуге шамасы болған. Ол сот процесі басталардан 20 минут бұрын жүрек айнуға қарсы дәрі салдырған.
Журналист өзіне тағылған айыптардың ешқайсысын мойындамады. Соңғы сөзінде өзін толықтай кінәсіз деп санайтынын айтып, қылмыстық істің саяси астары бар екенін мәлімдеді.
