Қостанай облысы Қарасу ауданы бойынша Мемлекеттік кірістер басқармасының бұрынғы басшысы Аязбек Құлназаров бас бостандығынан айырылды. Сот үкімі жарияланғаннан кейін ол сот залында бірден қамауға алынды, деп хабарлайды Ulysmedia.kz.
Мән-жай
Іс материалдарына сәйкес, 2026 жылғы наурызда Құлназаров шаруа қожалығының басшысына шамамен 18 млн теңге көлемінде салықтық сәйкессіздік анықталғанын айтқан.
Кейін шенеунік кәсіпкердің туысына мәселені ақшаға «шешіп беруді» ұсынған. Алдымен ол 7 млн теңге сұраған.
Шаруа қожалығының өкілі Қостанай облысы бойынша ҰҚК департаментіне жүгінген. Осыдан кейін ақша беру сәті арнайы қызметтің бақылауымен өткен.
Қарасу ауданы әкімдігі ғимаратының маңында Құлназаров 5 млн теңге алған сәтте ұсталды.
Кейінірек шаруа қожалығына қатысты салықтық талап қоюға нақты негіз болмағаны анықталды.
Сот қандай шешім шығарды?
Істі Қарасу аудандық соты қарады. Құлназаров кінәсін мойындап, өкінетінін айтып, бас бостандығынан айырмайтын жаза тағайындауды сұраған.
Оның әрекеті қызметтік жағдайын пайдаланып, ірі көлемде алаяқтық жасауға оқталу деп сараланды.
Сот бұрынғы шенеунікті 2 жыл 7 ай 15 күнге бас бостандығынан айырды. Ол жазасын қауіпсіздігі орташа мекемеде өтейді.
Сондай-ақ, Құлназаровқа өмір бойы мемлекеттік қызметте және мемлекеттік әрі квазимемлекеттік ұйымдарда қызмет атқаруға тыйым салынды.
Үкім оқылғаннан кейін ол сот залында қамауға алынды.
Сот шешімі әзірге заңды күшіне енген жоқ және оған шағым түсіруге болады.
