Қазақстан Газаны қалпына келтіруге атсалысуға дайын

Толығырақ

Бұл туралы Қазақстан Сыртқы істер министрінің орынбасары Арман Исағаалиев Ислам ынтымақтастығы ұйымы Сыртқы істер министрлері кеңесінің кезектен тыс сессиясында мәлімдеді. Кездесудің негізгі тақырыбы Палестинадағы жағдай мен палестиналық аумақтардағы гуманитарлық дағдарыс болды.

Исағалиев қақтығысты саяси-дипломатиялық жолмен мүмкіндігінше тезірек реттеу қажет екенін айтты. Оның сөзінше, Қазақстан Палестинаны халықаралық алаңдарда қолдап қана қоймай, іс жүзінде көмек көрсетуге де дайын.

Ықтимал шаралардың қатарында азық-түлік жеткізу, Газадағы әлеуметтік нысандарды қалпына келтіруге қатысу және палестиналық жастарға білім гранттарын бөлу бар.

Қазақстан сондай-ақ «екі халыққа – екі мемлекет» қағидатын және 1967 жылғы шекаралар негізінде астанасы Шығыс Иерусалим болатын тәуелсіз Палестина мемлекетін құруды қолдайтынын растады.

Кездесуде не шешілді

Сессия қорытындысы бойынша қатысушылар Палестина мәселесіне қатысты жеке қарар қабылдап, Ислам ынтымақтастығы ұйымының жаңа бас хатшысын сайлады.

Кездесуде дипломатиялық күш-жігерді жалғастыру, гуманитарлық көмекті кеңейту және өңірдегі шиеленістің одан әрі өршуіне жол бермеу қажеттігі де талқыланды.

Газада не болып жатыр

Газа секторындағы соғыс 2023 жылғы 7 қазанда ХАМАС пен одақтас топтардың Израильдің оңтүстігіне жасаған шабуылынан кейін басталды. Сол кезде шамамен 1 200 адам қаза тауып, 250-ден астам адам кепілге алынған.

Бұған жауап ретінде Израиль Газада ауқымды әскери операция бастады. 2026 жылғы тамызға қарай ауқымды әскери қимылдар азайғанымен, жағдай әлі де тұрақсыз. Израиль жекелеген соққылар мен рейдтерін жалғастырып отыр. Ал ХАМАС-ты толық қарусыздандыру, әскерді шығару және секторды болашақта басқару мәселелері бойынша келіссөздер әлі аяқталған жоқ.

Газа қатты қираған, тұрғындардың басым бөлігі үйлерін тастап кетуге мәжбүр болды. Су, электр энергиясы, медицина және азық-түлік мәселелері әлі де өзекті.

Аумақты қалпына келтіруге ондаған миллиард доллар қажет болады.