Қазақстанда микрокредиттер бойынша мерзімі өткен берешектің үлесі бір жыл ішінде 4,9%-дан 3,9%-ға дейін төмендеді. Халыққа берілген қарыздар бойынша бұл көрсеткіш одан да айтарлықтай азайып, 7,4%-дан 5,1%-ға түсті, деп хабарлайды Ulysmedia.kz.
Жалпы ахуал
2026 жылғы 1 шілдедегі жағдай бойынша микроқаржылық қызметпен айналысатын барлық ұйымдардың (МҚҰ, кредиттік серіктестіктер және ломбардтар) активтері 3,5 трлн теңге болды. Алты айда бұл көрсеткіш іс жүзінде өзгермеген (-0,1%). Екінші тоқсандағы шамалы өсім (+0,2%) кепілге қабылданған мүлік көлемінің артуы есебінен ломбардтар тарапынан қамтамасыз етілді.
Активтердің жартысына жуығын (49,4% немесе 1,7 трлн теңге) МҚҰ құрайды. Кредиттік серіктестіктердің үлесі – 31,7% (1,1 трлн теңге), ал ломбардтарға 18,9% (0,7 трлн теңге) тиесілі.
Несие портфелі
Екінші тоқсанда жалпы несие портфелі 0,6%-ға қысқарып, 3,1 трлн теңге болды.
Микрокредиттердің жартысынан астамы (54,7%) бизнеске, ал 45,3%-ы халыққа берілген.
Бизнеске берілген қарыздар 1%-ға төмендеп, 1,7 трлн теңге болды. Бұған кредиттік серіктестіктердің маусымдық қарыздарды өтеуі әсер етті.
Халыққа берілген кредиттер де 0,2% азайып, 1,4 трлн теңгеге түсті. Бұған тұтынушылық микрокредиттерді аз берген ломбардтар себеп болды.
Мерзімі өткен қарыз азайып келеді
Несие портфелінің сапасы жақсарған. 90 күннен астам мерзімі өткен проблемалық қарыздардың үлесі бір жыл бұрынғы 4,9%-дан 3,9%-ға дейін төмендеді.
Халыққа берілген қарыздар бойынша бұл көрсеткіш 7,4%-дан 5,1%-ға түсті.
1 шілдедегі жағдай бойынша микроқаржы ұйымдарының меншікті капиталы 1,3 трлн теңге болды. Жыл басынан бері капитал 0,6%-ға өскен. Бұл бөлінбеген пайданың есебінен қамтамасыз етілді.
