Владимир Путин бүгін Мәскеуде АҚШ президентінің арнайы өкілдері Стив Уиткофф пен Джаред Кушнермен кездеседі, деп хабарлайды Ulysmedia.kz.
Оқиғаның мән-жайы
Бұл туралы Ресей президентінің баспасөз хатшысы Дмитрий Песков мәлімдеді.
ТАСС мәліметінше, Путин түн ортасынан бастап Киевке жасалатын соққыларды үш күнге тоқтатуды тапсырған.
Песковтың айтуынша, мұндай шешім америкалық келіссөз жүргізушілердің Украина астанасына алдағы сапарына байланысты қабылданған.
Мәскеудегі кездесуден кейін Уиткофф пен Кушнер Киевке аттануға тиіс. Олардың Украинаға сапары 6 қыркүйекке жоспарланған.
АҚШ делегациясы Мәскеуде жүр
Уиткофф пен Кушнер Ресей астанасына 5 қыркүйекте келді. ТАСС олардың кортежінің кадрларын жариялады.
Путиннің өкілі Кирилл Дмитриев те америкалық келіссөз жүргізушілермен бірге түскен суреттерін жариялаған.
«Мәскеуге қош келдіңіздер, бітімгерлер — Стив Уиткофф пен Джаред Кушнер», – деп жазды ол.
Трамп соғысты тоқтату жөніндегі ұсыныс жіберді
Бұған дейін АҚШ президенті Дональд Трамп оның өкілдері Мәскеуге Украинадағы соғысты тоқтату жөніндегі ұсынысты алып барғанын мәлімдеген.
«Олар соғысты тоқтату туралы ұсынысты жеткізеді. Мен бұған дейін сегіз соғысты тоқтаттым. Мені мақтан тұтасыздар деп үміттенемін. Сегіз соғысты тоқтаттым, бірақ бұған ешкім лайық бағасын беріп жатқан жоқ», – деді Трамп.
Бұған дейін Путин Уиткофф пен Кушнерді Ресейде қуана қарсы алатынын және Мәскеуге олармен жұмыс істеу қолайлы екенін айтқан еді.
Бұған дейін Ресей Киев әуежайларына соққы жасаған
Владимир Зеленскийдің айтуынша, 5 қыркүйекке қараған түні Ресей әскері Киев пен Борисполь әуежайларын әдейі нысанаға алған.
Ол бұл шабуылдарды америкалық делегацияның Украинаға сапарына дайындықпен және олардың елге ұшақпен келу мүмкіндігімен байланыстырды.
Келіссөздерді қайта жандандыруға әрекет жасалып жатыр
Ресей, Украина және АҚШ арасындағы кейінгі үшжақты кездесу 17–18 ақпанда Женевада өтіп, келісімсіз аяқталған.
Келесі кезеңді 5 наурызда Әбу-Дабиде өткізу жоспарланған еді. Алайда АҚШ пен Израильдің Иранмен соғысы басталғаннан кейін кездесу кейінге шегерілді.
Тамыздың аяғында Мәскеуге АҚШ Орталық барлау басқармасының директоры Джон Рэтклифф те барған.
Кейін оның сапары кезінде Дональд Трамп, Владимир Путин және Владимир Зеленскийдің ықтимал кездесуі талқыланғаны хабарланды.
