Президент Қасым-Жомарт Тоқаев Конституциялық соттың судьясы Бақыт Нұрмұхановты осы орган төрағасының орынбасары қызметіне тағайындады, деп хабарлайды Ulysmedia.kz.
Нұрмұханов 1979 жылғы 13 мамырда Шығыс Қазақстан облысының Күршім ауданында дүниеге келген. Шығыс Қазақстан мемлекеттік университетін «Құқықтану» мамандығы бойынша тәмамдаған. Заң ғылымдарының кандидаты.
Ол конституциялық бақылау саласында 20 жылдан астам уақыттан бері қызмет етіп келеді. 2003 жылы Конституциялық кеңестің құқықтық бөлімінде кеңесші болып еңбек жолын бастап, кейін аппарат басшысы қызметіне дейін көтерілген.
Сонымен қатар, 2008–2017 жылдары Еуропа Кеңесінің Венеция комиссиясымен байланыс жөніндегі қызметкер міндетін атқарған.
2023 жылғы қаңтарда Конституциялық кеңес Конституциялық сот болып қайта құрылған кезде Нұрмұханов осы органның судьяларының бірі болды. Сол кезде ол Конституциялық сот төрағасының орынбасары болып тағайындалған.
Бұл қызметті 2026 жылғы қыркүйекке дейін атқарып, кейін Конституциялық сот судьясы қызметіне қайта оралған. Енді Қасым-Жомарт Тоқаев оны төраға орынбасары қызметіне қайта тағайындады.
Нұрмұханов Конституциялық реформа жөніндегі комиссияның құрамында да болған. «Құрмет» орденімен марапатталған.
Бұған дейін Ulysmedia.kz Конституциялық соттың жаңа Конституция жобасы бойынша атқарып жатқан жұмысы туралы жазған еді.
Атап айтқанда, Бақыт Нұрмұханов құжатта Президенттің Құрылтайды тарату өкілеттігіне қатысты тұжырымды өзгерту ұсынылғанын түсіндірген. Мәселен, бұған дейін Президент парламентті «таратады» деп жазылса, енді «таратуға құқылы» деген норма ұсынылған.
