Атырау облысында шенеунік газға қосылмаған 30 пәтерді 600 млн теңгеге сатып алған. Прокуратура оның бұл мәселені тендер өтпей тұрып-ақ білгенін анықтады. Соған қарамастан сатып алу рәсімін өткізген. Нәтижесінде ол қызметінен босатылды, деп хабарлайды Ulysmedia.kz.
Атырау облысының прокуратурасы құрылысқа бөлінген бюджет қаражатын жұмсау кезінде екі заңбұзушылық дерегін анықтады. Екі шенеунік те мемлекеттік қызметке кір келтіретін әрекет жасағаны үшін жауапкершілікке тартылған.
Газсыз қалған пәтерлер
Алғашқы жағдай Құрманғазы ауданында болған.
2024 жылы аудандық құрылыс бөлімі Құрманғазы ауылынан 30 пәтерді 600 млн теңгеге сатып алған.
Кейін үйдің газ тарату желісіне қосылмағаны белгілі болды.
Прокуратура бөлім басшысының бұл мәселені сатып алу рәсімі басталмай тұрып-ақ білгенін анықтаған.
Соған қарамастан ол тендер ұйымдастырған. Оның үстіне конкурс барысында жекелеген кәсіпкерлерге басымдық берілген.
Істі Әдеп жөніндегі кеңес қарап, бөлім басшысын қызметінен босату туралы шешім қабылдаған.
Істелмеген жұмысқа ақша төленген
Екінші заңбұзушылық Қызылқоға ауданында анықталған.
Онда құрылыс бөлімінің басшысы іс жүзінде орындалмаған жұмыс үшін мердігерге 900 мың теңге аударған.
Оған қызметіне толық сай еместігі туралы ескерту берілген.
Прокуратураның мәліметінше, осыған ұқсас заңбұзушылықтар үшін өңірде тағы үш шенеунік жауапкершілікке тартылған.
Мәнмәтін
Бұған дейін Жетісу облысында букмекерлік қосымша арқылы жүйелі түрде бәс тіккен екі шенеуніктің қызметінен босатылғанын жазған едік.
Олардың бірі аудандық бөлімшені 20 жылдан астам уақыт басқарған.
Ойын шоттарына аударылған қаражаттың жалпы көлемі 7,7 млн теңгеден асқан.
