Қазақстан Қашаған кен орнын игеруші оператордан 2,3 триллион теңге (5,2 миллиард доллар) көлеміндегі айыппұлды мәжбүрлеп өндіріп алу рәсімін қайта бастады, деп хабарлайды Ulysmedia.kz.
Толығырақ
Айыппұл күкіртті сақтау талаптарын бұзғаны үшін халықаралық NCOC консорциумына салынған. Оның құрамына Shell, TotalEnergies, ExxonMobil, CNPC, «ҚазМұнайГаз», Eni және Inpex кіреді.
Консорциум тағылған айыптарды мойындамайды және айыппұлға барлық қолжетімді тәсілдермен шағымданып жатқанын мәлімдеді. Бұл туралы Reuters Әділет министрлігіне сілтеме жасап хабарлады.
Өндіріп алу рәсімі NCOC Атыраудағы сотта жеңілгеннен кейін қайта басталды. Компания атқарушылық іс жүргізуді бастау туралы шешімге шағымданып, жылжымайтын мүлік пен көлікке салынған тыйымды алып тастауды және мәмілелер жасауға қойылған шектеуді жоюды талап еткен. Сот оның бес талабын да қанағаттандырмады.
Даудың басы...
Бұл дау 2022 жылдан бері жалғасып келеді. Экологтар Қашаған кен орнында 773 мың тоннаға рұқсат етілген мөлшердің орнына 1,7 миллион тонна күкірт сақталғанын анықтаған.
NCOC болса, барлық жұмысты қолданыстағы рұқсаттар аясында жүргізгенін алға тартады.
2026 жылдың жазында консорциум айыппұлды ерікті түрде төлемегеннен кейін мемлекет мәжбүрлі өндіріп алу шараларына көшті. Шілдеде Әділет министрлігі NCOC-тің мүлкі мен көліктеріне тыйым салды.
Қыркүйекте өндіріп алу рәсімі уақытша тоқтатылды. Компания сот орындаушысының әрекетіне шағымданған. Енді сот құжаттарды қайтарып, консорциумның барлық талаптарын қанағаттандырудан бас тартты. Осылайша, айыппұлды өндіріп алу жалғасып жатыр.
NCOC-тің Атырау облыстық сотына апелляциялық шағым түсіруге мүмкіндігі бар.
Бұл неге маңызды?
Қашаған — соңғы онжылдықтарда ашылған әлемдегі ең ірі мұнай кен орындарының бірі. Оның өндірілетін қоры 13 миллиард баррель деп бағаланады.
Жобаға салынған инвестицияның жалпы көлемі шамамен 60 миллиард доллар болады.
Қазақстан әлемдік мұнай өндірісінің шамамен 2%-ын қамтамасыз етеді.
Сонымен қатар Қазақстан бірнеше кен орны бойынша халықаралық мұнай компанияларымен арбитраждық даулар жүргізіп жатыр. Мемлекет оларды экологиялық талаптарды бұзды және сыбайлас жемқорлыққа жол берді деп айыптайды.
