14 қазанда Аймен Қасенов Қырғызстанның Орталық сайлау комиссиясына өзін-өзі ұсыну туралы өтініш берді. Көрші елде президент сайлауы 2027 жылғы 27 қаңтарға белгіленген. Мемлекет басшысы лауазымына үміткер болғысы келетіндер құжаттарын 13 қарашаға дейін тапсыра алады, деп хабарлайды Ulysmedia.kz.
Қазақстанда сегіз жыл жұмыс істеген
Аймен Қасенов 52 жаста. Ол қазіргі Бішкек қаласында дүниеге келген. Маркетинг, менеджмент және құқық салалары бойынша білім алған. Еңбек жолының басым бөлігін мұнай-газ саласындағы бизнеске арнаған.
Оның Қазақстанмен байланысы ұзақ жылдық еңбек тәжірибесімен байланысты. 2007-2015 жылдары Қасенов Алматыда орналасқан «Газпром нефть – Қазақстан» компаниясын басқарды. Бұған дейін «Газпром нефть – Тәжікстан» компаниясы бас директорының орынбасары қызметін атқарған.
Қазақстандағы компаниядан кеткеннен кейін Қасенов Қырғызстанға оралды. 2015–2016 жылдары Бішкек мэрінің кеңесшісі болып жұмыс істеді. Кейін Ресей-Қырғызстан даму қорының басқармасына кірді.
Президенттікке екінші рет талпынып отыр
Қасеновтің мемлекет басшысы лауазымына үміткер болуға талпынысы алғаш рет болып отырған жоқ. 2020 жылғы қарашада да ол Қырғызстандағы президент сайлауына қатысу үшін өтініш берген. Сол кезде Орталық сайлау комиссиясының құжаттарында оның уақытша жұмыс істемейтіні көрсетілген.
Қасеновтің кәсіпкерлік саласында көпжылдық тәжірибесі бар. Сондай-ақ оның Ыстықкөл облысындағы «Жетіген» балалар лагерінің тең құрылтайшысы екені белгілі.
Үйленген, төрт баласы бар
Алдыңғы сайлауда Аймен Қасенов дауыс беруге дейін жеткенімен, сайлаушылардың бір пайызынан аз дауысын жинады. Орталық сайлау комиссиясының ресми қорытындысы бойынша, 2021 жылғы қаңтарда оған 12 684 адам дауыс берген. Бұл сайлаушылардың 0,91 пайызына тең.
Сол сайлауда Садыр Жапаров 79,2 пайыз дауыс жинап, жеңіске жетті.
