×
472.68
466.91
8.01
#қаңтар қақтығысы #Ресей-Украина соғысы #әкімге үш сұрақ #лот ашар #кибербуллинг #жаңа облыстар #коронавирус #hi-tech
472.68
466.91
8.01

Билік «сұр майнерлерге» неге көз жұма қарады - министрдің жауабы

25.03.2022, 13:54
Фото: Ulysmedia коллажы

Энергетика министрі Болат Ақшолақов «сұр майнерлердің» неліктен былтыр ұсталмай келгенін түсіндіруге тырысты, деп хабарлайды ulysmedia.kz.

«Сұр майнерлердің» әрекеті туралы Энергетика министріне Орталық коммуникациялар қызметінде бүгін тағы да сұрақ қойылды

«КЕГОК пен Энергетика министрлігі елде қай жерде қанша электр энергиясы алынып жатқанын біледі. Тиісінше осы уақытқа дейін электр тоғы майнерлерге кетіп жатқанын жақсы білді. Түсіндіріңізші, неліктен 2022 жылдың ақпан айына дейін Энергетика министрлігі «сұр майнерлерді» білгенімен, неліктен құрықтамай келді? Бұл – майнерлікпен Назарбаевтар отбасы айналысқаннан кейінгі шарасыздық па? Болат Назарбаевты, Нығматулинді «сұр» жұмысы үшін жауапкершілікке тартуға не кедергі болды?» - деп сұрады журналист Серікжан Мәулетбай министрден.

Бұл сұраққа жауап берген Болат Ақшолақов істің бәрі заң аясында тексеріліп жатқанын атап өтті.

«Былтырдан бері қарасақ, мұның бәрі заң шеңберінде қаралып жатыр. Бүгін де цифрлық майнингті реттейтін заң жоқ. Сол себепті оған жұмыстың бір түрі ретінде тыйым салынбай келді. Жүйеде әрине тұтынушылар көрініп тұрды. Өйткені іске қосу шарттары беріліп келді. Тіркелген майнерлер қосылу үшін техникалық шарттарды КЕГОК-тан ғана емес, жергілікті РЭК-терден де алды. Қосылған да жұмыс істеген. Ал «сұр» және «қаралары» жай сөзбен айтқанда электр энергиясын ұрлаған», - деді энергетика министрі.

Болат Ақшолақовтың айтуынша, майнинг – сала ретінде заңнамалық тұрғыда ешқайда тіркелмеген. Қазір Парламентте цифрлық активтер туралы депутаттық заң жобасы қаралып жатыр. Ол құжатта майнерлер кім екені, дата-орталықтардың не екені туралы бәріне толық түсінік беріледі. «Осыдан кейін ғана заңнамалық алаң туралы сөз қозғауға болады» дейді министр.

«Меніңше, майнингпен шамасы келген кез келген адам айналысқан секілді. Міндетті түрде белгілі бір фамилиялар емес. Қаржы мониторингі агенттігімен бірге тексеруге қатысты мәселелер талқыланып жатыр. Тексерулердің нәтижесі ешкімге қатысы жоқ жекелеген адамдардың да майнингпен айналысқанын көрсетті. Заң шықсын, айқындалсын. Заңнамада пробелдер бар. Сондықтан заң жобасы заңдағы кемшіліктерді жояр деген сеніміміз бар. Ал салық жағынан олар биылдан бастап төлеуі керек. Былтыр олар төлемеген», - деді ол.

Еске сала кетсек таяуда Қазақстандағы майнингтік фермалардың қызметін кешенді тексеру қорытындысы бойынша 55 ферма қызметін өз еркімен тоқтатқан болатын. Қаржы мониторингі агенттігінде хабарлағандай, олардың арасында Павлодар облысында Болат Назарбаев және Александр Клебановтың, Ақтөбе облысында «QazaqGaz ұлттық компаниясы» АҚ басқармасының бұрынғы төрағасы Қайрат Шәріпбаев және Қарағанды облысында Ерлан Нығматулиннің үлесі бар фермалар анықталған. Агенттіктің мәліметінше, Қарағанды облысында майнинг фермасы «Сарыарқа» АЭА аумағында заңсыз қызмет еткен, Павлодар облысында жылыжай шаруашылығымен айналысатын екі компания өз электр энергиясының артығын майнинг үшін үшінші тұлғаларға лицензиясыз сатқан.