Астанада 11 және 14 жастағы екі бала қала шетінде адасып, үйлеріне қайта алмай қалған. Оларды іздеуге жүздеген адам жұмылдырылды, деп хабарлайды Ulysmedia.kz.
Екі бала қалың шөп өскен алқап арқылы қалаға жетпек болған. Алайда жолда бағытынан жаңылып, қай жаққа жүру керегін білмей қалған.
Балалар өздері полицияға хабарласып, көмек сұраған.
Оларды іздеуге 200-ден астам полицей, Төтенше жағдайлар министрлігінің қызметкерлері, Ұлттық ұлан сарбаздары мен еріктілер жұмылдырылды.
Іздеу жұмыстары кезінде арнайы техника мен қызметтік ит пайдаланылды. Құтқарушылар мен тәртіп сақшылары балалар жоғалған аумақты түгелдей тексерді.
Біраз уақыттан кейін екі бала да аман-есен табылып, ата-анасына тапсырылды.
Оқиғадан кейін полиция балаларды тәрбиелеу және олардың қауіпсіздігін қамтамасыз ету міндеттерін тиісінше орындамағаны үшін заңды өкілін әкімшілік жауапкершілікке тартты.
Ал балалардың өздерімен түсіндіру жұмыстары жүргізілді.
Полиция ата-аналарға балаларының қайда жүргенін және қандай жолмен қатынайтынын үнемі қадағалап отыру керегін ескертті. Әсіресе балалар бейтаныс жермен жүретін болса, олардың қауіпсіздігіне ерекше назар аударған жөн.
