Павлодар облысының қылмыстық істер жөніндегі мамандандырылған ауданаралық соты жергілікті тұрғынды өмір бойына бас бостандығынан айыруға үкім шығарды. Ер адам 10 және 11 жастағы екі өгей қызына жыныстық зорлық-зомбылық көрсетіп, оларға АИТВ жұқтырған, деп хабарлайды Ulysmedia.kz.
Оқиға қалай болған
Тергеу нұсқасы бойынша, ер адам 2018 жылдан бері екі қызы бар әйелмен бірге тұрған. Екі қыздың да ақыл-ой кемістігі болған.
«Ирбис» телеарнасының хабарлауынша, 2025 жылғы желтоқсанның ортасында анасы шаруаларымен сыртқа шығып, балаларды өгей әкесімен қалдырған. Ол ішімдік іше бастаған. Бірнеше сағаттан кейін ер адам 10 жастағы өгей қызына, ал бір сағаттан соң оның 11 жастағы әпкесіне жыныстық зорлық-зомбылық көрсеткен.
Кейін ер адамның АИТВ жұқтырғаны және екі қызға да осы инфекцияны жұқтырғаны анықталған.
Сот үкімі
Іс екі бап бойынша қаралды. Сот әр бап бойынша өмір бойына бас бостандығынан айыру жазасын тағайындады. Ер адам жазасын төтенше қауіпсіздік мекемесінде өтейді.
Үкім әлі заңды күшіне енген жоқ.
Контекст
Бұған дейін Атырауда полиция қызметкерлері 23 және 28 жастағы екі адамды ұстаған. Олар АИТВ инфекциясын қасақана жұқтырды деген күдікке ілінді.
Полицияның мәліметінше, екеуі де өздерінің инфекция жұқтырғанын біле тұра, ақылы интимдік қызмет көрсетуді жалғастырған.
Мұндай қылмыс үшін заңда бес жылдан 10 жылға дейін бас бостандығынан айыру жазасы қарастырылған.
