Алматыда ішек инфекциясының белгілерімен ауруханаға түскен Республикалық физика-математика мектебінің барлық оқушысы емделіп, үйлеріне қайтты. Барлығы 58 бала ем қабылдаған, деп хабарлайды Ulysmedia.kz.
Дәрігерлердің түсініктемесі
Қалалық қоғамдық денсаулық сақтау басқармасының мәліметінше, оқушылар Балалар қалалық клиникалық инфекциялық ауруханасына 12 қазаннан бастап түсе бастаған. Олардың барлығы қажетті емді алып, үйлеріне оралды.
– Бүгінде Алматыдағы Балалар қалалық клиникалық инфекциялық ауруханасына жатқызылған Республикалық физика-математика мектебінің барлық оқушысы емделіп, ауруханадан шығарылды, – деп хабарлады қалалық басқарма.
Контекст
Еске салайық, оқушылар жаппай сырқаттанғаннан кейін санитариялық дәрігерлер РФММ асханасын тексерген. Онда тамақтандыруды Master Food ЖШС ұйымдастырған.
Тексеру барысында азық-түлікті сақтау, тамақ дайындау және тәуліктік сынамалар алу кезінде заңбұзушылықтар анықталған. Сүт өнімдерінің бір бөлігінде қажетті құжаттар болмаған. Оларды алып қою туралы шешім қабылданған.
Тексеру материалдары құқық қорғау органдарына жолданды. Сонымен қатар мектеп пен асхананы уақытша жабу туралы қаулылар шығарылды.
