Бортында бірнеше айдан бері Қазақстан азаматы жүрген Unity танкері жақындап келе жатқан дауылға байланысты Үндістан жағалауына қарай сүйретіліп жеткізілді. Кеме әлі де тыйымда тұр, ал экипаж мүшелері үйлеріне қайта алмай отыр, деп хабарлайды Ulysmedia.kz.
Теңізшілердің бірінің туысының айтуынша, Unity танкерінің қозғалтқышы істемейді, сондықтан кеме апаттық жағдайда тұр, деп жазады РИА Новости.
– Танкерді жағалауға жақындатып сүйреп апарды. Қаншалықты жақындатқаны белгісіз. Ол жақта тұман, жағалау көрінбейді, – деді ол.
Кемені жылжыту туралы шешім Үндістан синоптиктерінің ескертуінен кейін қабылданған. Бенгал шығанағында дауыл қалыптасып жатыр. Болжам бойынша, ол 26 қазанға қарай күшейіп, 28 қазан таңертең Үндістанның шығыс жағалауына жақындайды.
Парадип порты орналасқан Одиша штатында нөсер жаңбыр жауып, екпінді жел соғады деп күтілуде.
Камерун туымен жүзетін Unity танкеріне 11 мамырда кеме иесі мен жергілікті жанармай жеткізуші арасындағы қаржылық дауға байланысты тыйым салынған. Содан бері экипаж мүшелері кемеден кете алмай отыр.
Бастапқыда бортта 23 адам: 20 ресейлік, екі Мысыр азаматы және бір қазақстандық бар екені хабарланған.
Осы бірнеше айда теңізшілердің жалақысы кешігіп, азық-түлік тапшылығы туындаған. Туыстарының айтуынша, маусымда тамақтың жетіспегені сонша, экипаж мүшелерінің әрқайсысы күніне төрт картоппен күнелтуге мәжбүр болған.
Кейін сақтандыру компаниясы жалақы бойынша берешекті өтеп, кемеге азық-түлік жеткізе бастаған. Алайда теңізшілердің отбасылары жеткізілімнің ара-тұра кешіккенін айтады.
Қыркүйекте Unity қатты дауыл кезінде қауіпті жағдайға тап болған. Танкер зәкірінен босап кетіп, қозғалтқышы істемегендіктен жел мен ағыс айдаған жаққа ыға бастаған.
Соған қарамастан, экипаж кемеде қала берген. Қазақстанның Сыртқы істер министрлігі бұған дейін Үндістан билігіне қазақстандық теңізшіні елге қайтаруға көмектесуді сұрап, дипломатиялық нота жолдаған.
6 қазанда сот Үндістан билігін теңізшілерді үйлеріне қайтаруды ұйымдастыруға және оларды алмастыратын экипаждың келуін қамтамасыз етуге міндеттеген. Мұны мүмкіндігінше тез, дұрысы, сот шешімінің көшірмесін алғаннан кейін үш апта ішінде орындау тапсырылған.
Кейін адвокаттар теңізшілерге 28 қазанға дейін Үндістаннан кете алатынын хабарлаған. Алайда Ресейдің Калькуттадағы бас консулдығы олардың елге қайту мерзімі мен тәртібі әлі түпкілікті келісілмегенін нақтылады.
Бұған қоса, теңізшілердің туыстары танкерді сату жоспарланып отырғанын хабарлады. Олар экипажға ауысым келгенше немесе кемені сату рәсімі аяқталғанша бортта қалуға тура келе ме деп алаңдайды.
