Астана соты оппозициялық көзқарастағы Мәжіліс депутаттығына кандидат Марат Жыланбаевқа "науқанды мерзімінен бұрын жүргізгені үшін" айыппұл салды. Бұл туралы Азаттық радиосына сілтеме жасап Ulysmedia.kz хабарлайды.
Жыланбаев – «Алға, Қазақстан!» оппозициялық партиясын құру жөніндегі бастамашыл топтың мүшесі.
Белсендінің әлеуметтік желідегі парақшасын «бақылау» кезінде белгіленген уақыттан бұрын сайлауалды үгіт-насихат белгілерін тапқан прокурор сотқа шағымданды.
Жыланбаев тағылған айыпты мойындамайды.
«Жыланбаевтың мәлімдемелерін зерделегеннен кейін сайлаушыларды оның кандидатурасына дауыс беруге және қаржылық қолдау көрсетуге ынталандыратын мерзімінен бұрын сайлауалды үгіт-насихат жұмыстары жүргізіліп жатқаны анықталды», - деді прокурор Шерхан Шорабек жұма күні түстен кейін онлайн сотта.
Ол белсендінің қаңтар айының соңында жарияланған видеосынан үзінді келтірді: "Біз жұмыс істеп, тек халықтың мүддесін қорғаймыз. Қиын да даулы сәттерді тікелей эфирде әлеуметтік желілерде сіздермен ақылдасып отырамыз. Бізді қолдаңыздар, біз жеңеміз. Алға , Қазақстан!», – делінген онда.
Нәтижесінде, 24 ақпанда Астана қаласының әкімшілік соты Жыланбаевқа ҚР ӘҚБтК-нің 102-бабы (Тыйым салынған кезеңде сайлауалды үгіт-насихат жұмыстарын жүргізу) бойынша 51 750 теңге айыппұл салды.
Марат Жыланбаев – қазақстандық марафоншы, мемлекетті сынайтын пікірлерімен де танымал. Ол әлемдегі ең үлкен шөлдерді жалғыз жүгіріп өткен. Былтыр «Ар-Бедел» қоғамдық қоры белсендінің мәлімдемесінен кейін экс-президент Нұрсұлтан Назарбаевтың ар-намысын қорлады деген айыппен Жыланбаевты сотқа берген болатын. Жыланбаев сотта жеңіске жетті.
