×
429.57
447.35
6.94
#қаңтар қақтығысы #Ресей-Украина соғысы #әкімге үш сұрақ #лот ашар #кибербуллинг #жаңа облыстар #коронавирус #hi-tech
429.57
447.35
6.94

Бағдат Мусин: Бізде айтишник дипломын алғандар таксист боп жүр

09.04.2022, 20:46
Фото: Ашық дереккөзден

Цифрлық даму, инновациялар және аэроғарыш өнеркәсібі министрі Бағдат Мусин не үшін шет елдерден ІТ мамандарды шақырғанын түсіндірді. Бұл туралы министр Ulysmedia.kz порталына берген сұхбатында айтты.

«Неліктен шетелдік ІТ мамандарын тарту біз үшін маңызды? Кеше Арсенмен (Индрайвердің иесі) сөйлестік. Мен одан «қазақстандық ІТ мамандарына даму үшін не керек» деп сұрадым. Ішкі ойым «мен ІТ маман ретінде адам капиталына басымдық беру керек деп есептеймін. Яғни адамдарды даярлауға күш салған жөн. Қалғаны соншалықты маңызды емес» деп ойлайтынмын. Осы ойды айтқанымда Арсен «бұл өте дұрыс пікір» деп қабылдады. Өйткені оның айтуынша, «мемлекет ІТ салаға ақша сала бастаған кезде бұл да дұрыс емес. ІТ мамандары бәрібір өз идеясымен жұмыс істейді». Якутияда ешқандай орталық болмаған. Соған қарамастан Арсен әлемдік деңгейдегі стартапты ойлап тапты ғой», - дейді министр.

Министр елдегі ІТ мамандардың жартысы, 50 пайызы тек қағаз жүзіндегі мамандар екенін білетінін айтады.

«Статистика сондай. Олар ІТ мамандары емес, бір жерден диплом алып, өзін айтишник санап жүрген адамдар. Ал нағыз ІТ маманына диплом маңызды емес. Ол Ютуб немесе басқа алаңдарда курстар мен менторларды тауып алып, біліктілігін арттыра береді. Мысалы Гугл жұмысқа алған кезде диплом талабын мүлде алып тастады. Сондықтан, біз ең бастысы адам капиталына мән беруіміз керек», - дейді ол.

Мусин орта қалыптастырып, әлемдік ІТ мамандары мен отандық мамандарды тартып, аймақтың жалпы ортақ деңгейін жаңа көрсеткішке жеткізуді көздеп отыр.

«Бізге көшкісі келетін ІТ мамандарға есігіміз ашық. Келсін де жұмыс істесін. Ал бізде ІТ маманның дипломын алғанымен, сол адамның Яндексте такси болып жүргендері көп. Нағыз ІТ маман шопыр емес. Қосалқы түрде болуы мүмкін. Негізі ол бір жерде бүгінгі есеппен 1 мың доллар айлық алуы керек. Ол нағыз ІТ маманы», - дейді ол.