Алматы облыстық Полиция департаментінің экс-басшысы Серік Күдебаевқа қатысты сот отырысы кейінге шегерілді, деп хабарлайды Ulysmedia.kz.
Жетісу облыстық сотының ресми өкілі Нұрсұлтан Орынбасаровтың сөзінше, айыпталушы ауруханаға түсіп қалған. Сондықтан сот отырысын кейінге шегеруге тура келген.
Бүгін сағат 10.00-ге жоспарланған сот отырысында Күдебаев соңғы сөзін айтуы керек болған.
Еске салсақ, Серік Күдебаев 2020 жылдан 2022 жылдың қаңтарына дейін Алматы облысы полиция департаментінің бастығы қызметін атқарды. 58 жастағы полиция генарал-майоры қызмет бабын асыра пайдаланды деген күдікке ілінді. Тергеу мәліметінше, ол қаңтар оқиғасы кезінде жұмыс орнын тастап, кетіп қалған. Жаппай тәртіпсіздіктер кезінде полиция департаментінен қару-жарақтар ұрланған.
Күдебаевтың соты биылғы жылдың қаңтарында басталды.
28 ақпандағы сот отырысында мемлекеттік айыптаушы судьядан күдікті Серік Күдебаевты тоғыз жылға бас бостандығынан айыруды сұрады.
