×
477.37
460.38
8.27
#қаңтар қақтығысы #Ресей-Украина соғысы #әкімге үш сұрақ #лот ашар #кибербуллинг #жаңа облыстар #коронавирус #hi-tech
477.37
460.38
8.27

Әбдірахимов өзіне қарсы тергеу басталғанын жоққа шығарды

20.05.2022, 14:50
Ulysmedia.kz

Бұрынғы мәдениет вице-министрі Ғабидолла Әбдірахимов Ulysmedia.kz порталына берген сұхбатында өзіне қатысты қозғалған қылмыстық іс туралы ақпаратты жоққа шығарды.

Бұған дейін журналист Михаил Козачков ҰҚК бұрынғы басшысы Кәрім Мәсімов пен Ғабидолла Әбдірахимовқа қатысты «рейдерлік» бабы бойынша қылмыстық іс қозғалғанын жазған.

Алайда бұрынғы мәдениет вице-министрінің айтуынша, ол ешқайда кетпеген, қазір Нұр-Сұлтанда.

Әбдірахимов өзінің адал кәсіппен айналысатынын және ешқашан рейдерлік тәркілеуге қатыспағанын айтады.

Сондай-ақ Ulysmedia.kz порталы Бас прокуратураға ресми ақпарат алу туралы сауал жолдады.

Ғабидолла Әбдірахимов 1975 жылы 23 қаңтарда Қазақстанның оңтүстігінде дүниеге келген. 1996 жылы Қазақ мемлекеттік аграрлық университетінен экономист-бухгалтер мамандығын алып шығады. 1997-1999 жылдары «Болашақ» бағдарламасы бойынша Неміс Жоғары мемлекеттік басқару мектебінде оқиды.

Төрт тілді меңгерген Әбдірахимов әр жылдары Қазақстанның лауазымды қызметтерін атқарды. Атап айтсақ, ҚР Мемлекеттік қызмет істері агенттігін, ҚР Бәсекелестікті қорғау агенттігін басқарды, Премьер-Министр Кеңсесінің Басшысы, Қазақстан Президенті Әкімшілігі Басшысының орынбасары болды.

Шымкент қаласының әкімі қызметін атқарды. «Нұр Отан» партиясының хатшысы, ҚР Премьер-Министрінің кеңесшісі, ҚР Мәдениет және спорт вице-министрі болып та қызмет атқарды.

Еске салсақ, Ұлттық қауіпсіздік комитетінің бұрынғы басшысы Кәрім Мәсімов жаппай тәртіпсіздіктерден кейін 6 қаңтарда қызметінен босатылды. 8 қаңтарда оның ұсталғаны белгілі болды. Сондай-ақ оның екі орынбасары – Әнуар Садықұлов ("А" арнайы мақсаттағы қызметінің бастығы) мен Дәулет Ерғожин ұсталды.

Артынан Мәсімовтың тағы бір орынбасары Марат Өсіпов қамауға алынды. Ал Қазақстанның тұңғыш президенті Нұрсұлтан Назарбаевтың немере інісі Самат Әбіш қызметінен босатылды.

Күдіктілерге мемлекетке опасыздық жасау және билікті күшпен басып алуға немесе Қазақстанның конституциялық құрылысын күштеп өзгертуге бағытталған әрекеттерден басқа, "билікті немесе қызметтік өкілеттіктерді асыра пайдалану" бабы бойынша айып тағылып отыр. Сосын пара алу фактілері бойынша тергеу шаралары қолға алынды.