Техас штатында қарулы адам оқ жаудырып, бес адамды, оның ішінде сегіз жасар бала мен екі әйелді атып өлтірді. Бұл туралы bbc.com сайтына сілтеме жасап Ulysmedia.kz хабарлайды.
Қайғылы оқиға күні кеше Хьюстоннан солтүстік-шығысқа қарай 70 шақырым жерде орналасқан Кливленд қаласында болды.
Полицейлер кісі өлтірген күдіктіні іздестіруде. Америкалық құқық қорғау органдары ер адамды мас болған деп болжайды.
Ол кезде үйде 10 адам болған, олардың барлығы Гондурастан келген.
"Кеше мен атыс дыбысын естідім және бұл жай ғана күннің күркіреуі деп ойладым. Мұндай болады деп елестете де алмадым", - деді көршілердің бірі журналистерге.
Техастағы бұл қырғынның себептері әлі күнге дейін күмәнді.
