Өскемендіктер алтын түсті стафилококк бар шаурмадан жаппай уланды, деп хабарлайды Ulysmedia.kz YK-news.kz сайтына сілтеме жасап.
Шығыс Қазақстан облысы бойынша санитарлық-эпидемиологиялық бақылау департаментінің басшысы Салтанат Базарханова қоғамдық тамақтану орындарының бірінде орын алған улану жағдайларын мәлімдеді. Мамандар қажетті эпидемияға қарсы іс-шараларды жүргізді, оның ішінде пациенттермен, сондай-ақ байланыста болған адамдармен әңгімелесу және тексерулер қолға алынған. Сондай-ақ судың, шикізаттың және дайын өнімнің сынамалары алынып, сауда нүктесінің қызметкерлеріне сауалнама жүргізілді.
Тексеру нәтижесінде осы нысанда дайындалып, сатылған тауық шаурмасынан алтын түсті стафилококк бар екені анықталды. Көптеген заңбұзушылықтар да әшкере болды, оның ішінде рұқсат құжаттарының, пайдаланылатын шикізаттың сапасы мен қауіпсіздігіне қатысты құжаттардың, өндірістік бақылау бағдарламасының, сондай-ақ ыдыстарды, жуғыш және дезинфекциялау құралдарын жуу мен дезинфекциялау шарттарының орындалмағы бар. Сонымен қатар, қызметкерлер медициналық тексеруден өтпеген.
Анықталған заң бұзушылықтарға байланысты аталған нысанға қатысты екі әкімшілік құқық бұзушылық туралы хаттама толтырылды. Оның бірі – рұқсатсыз қызметті жүзеге асырумен байланысты болса, екіншісі – адам денсаулығына зиян келтіруге әкеп соққан санитарлық-эпидемиологиялық салауаттылық саласындағы заңнама талаптарын бұзумен байланысты. Құжаттар Өскемен қаласының мамандандырылған сотының қарауына жіберілді.
