×
479.42
467.91
8.21
#қаңтар қақтығысы #Ресей-Украина соғысы #әкімге үш сұрақ #лот ашар #кибербуллинг #жаңа облыстар #коронавирус #hi-tech
479.42
467.91
8.21

Екі өңірдің ауруханаларына 14 млн теңге айыппұл салынды

25.07.2022, 14:07
фото: ашық дереккөзден

Алматы және Жетісу облыстарында медициналық қалдықтарға қойылатын санитариялық-эпидемиологиялық талаптарды бұзған денсаулық сақтау объектілеріне 14 млн теңгеге айыппұл салынды, деп хабарлайды Ulysmedia.kz.

Бұл туралы Алматы облыстық санитариялық-эпидемиологиялық бақылау департаменті баспасөз қызметі хабарлады.

«Алматы облысының санитариялық қызметі денсаулық сақтау объектілерінде қалдықтарды жинауға, залалсыздандыруға және сақтауға қойылатын санитариялық-эпидемиологиялық талаптардың бұзылуына байланысты жалпы сомасы 14 млн теңгеге 74 айыппұл салды. Оның ішінде медициналық қалдықтарды жинау, сақтау және есепке алу мерзімдері бойынша заң бұзған жеке тұлғаларға 69 айыппұл, лауазымды тұлғаларға 3 айыппұл және медициналық қалдықтарды уақытша сақтау үй-жайын жарақтандыру және жабдықтау жөніндегі нормаларды сақтамағаны үшін заңды тұлғаларға 2 айыппұл салынды»,- делінген хабарламада.

Ведомствоның ақпаратына сәйкес, медициналық қалдықтарды жинауға, залалсыздандыруға және сақтауға қойылатын санитариялық талаптардың сақталуы облыстық СЭБД тұрақты назарында.

Бүгінгі таңда департаментінің бақылауында 1793 медициналық ұйым бар. Медициналық ұйымдардың әрбір құрылымдық бөлімшесінде медициналық қалдықтармен жұмыс істеу схемасы әзірленіп, медициналық қалдықтарды жинау және уақытша сақтау үшін жауапты тұлғалар бекітілген.

Медициналық қалдықтар арнайы бір рет қолданылатын полиэтилен пакеттерге және қақпағы тығыз жабылатын ыдыстарға жиналады. Олар медициналық қалдықтардың класына байланысты белгіленеді. Бекітілген кестеге сәйкес мамандандырылған ұйымдармен жасалған келісімшарт негізінде шығарылып, жойылады. Бұл мекемелерде қалдықтарды дұрыс жоюға арналған пештер мен жабдықтар бар.

Департаменттің аумақтық басқармаларының бақылауында медициналық қалдықтарды жоюмен айналысатын 14 ұйым бар. Оның біреуі өңдеу қуаты сағатына 120 килограмнан астам болғандықтан эпидемиялық маңызы жоғары, қалған 13-і эпидемиялық маңызы болмашы объектілер саналады.

Жыл басынан бері медициналық қалдықтардың «А» сыныбының қалдықтары – 5721, 906 тонна, «Б» сыныбындағы эпидемиологиялық қауіпті қалдықтар – 18620,075 тонна, «В» сыныбының эпидемиологиялық аса қауіпті қалдықтар – 3360,991 тонна, «Г» сыныбындағы токсикологиялық медициналық қалдықтардан – 3616 дана шығарылды. Олар - бактерицидтік, люминесцентті, құрамында сынап бар, жарық диодты шамдар, термометрлер, гигрометрлер және рентген пленкалары.