×
477.37
460.38
8.27
#қаңтар қақтығысы #Ресей-Украина соғысы #әкімге үш сұрақ #лот ашар #кибербуллинг #жаңа облыстар #коронавирус #hi-tech
477.37
460.38
8.27

Үкімет АЭС-ті Ресеймен салуды біржақты шешсе халық ол шешімді ауыр қабылдайды – энергетик

08.08.2022, 09:15
Коллаж: ulysmedia.kz.

Энергетик маман Бекжан Әлімқұлов АЭС мәселесіне келгенде Үкіметке халықтың 100% сенімі керек деп есептейді, деп хабарлайды Ulysmedia.kz порталы.

«Ресей болсын, Қытай болсын мемлекеттік компаниялар ақшаны аямады. Технология ол жақтарда жақсы дамып отырды. Росатомды мойындау керек. Егер саяси көзқараспен қарамайтын болсақ, олардың технологиясы қазіргі заманда ең озық технологиялардың бірі. Дегенмен олар көршіміз болғандықтан үлкен тәуекелдер бар. Аузы күйген үріп ішеді деген сөз бар. КТК-ның жағдайын көрдіңіздер. Солай қарайтын болсақ, ертең Ресей АЭС-ті соғып, ол Ресейдің қол астында болса, онда саяси және геосаяси тұрғыдан бұл дұрыс шешім деп санамаймын», - дейді Бекжан Әлімқұлов.

Маманның айтуынша, халықтың қазір Ресей АЭС-іне саяси тұрғыдан қарсылық білдіріп жатқанын түсінген жөн деп есептейді.

«Ресейдің қазір жасап жатқаны, Медведевтің «байқамай» хакерлерге сілтеп, пост жариялауы дау туғызады. Ресейді басқарып отырған адамдардың саяси көзқарасына қарасаңыздар, Ресеймен кез келген серіктестік шикілік ретінде қабылданады. Бүкіл әлем Ресейден бас тартып жатқан кезде Ресеймен серіктес болу бір жағынан ойландыратын мәселе», - дейді ол.

Оның айтуынша, «халықтың қолдауынсыз, Үкімет шешім қабылдап, Ресеймен жұмыс істейміз деген ақпарат таратса, бұл ақпарат (қоғам тарапынан) өте ауыр қабылданады».

Қаңтар оқиғасының алдында былтыр Қайрат Келімбетов «біз Ресеймен АЭС саламыз» деген сыңайда ақпарат берген болатын. Одан бері көп өзгеріс болды. Халықтың қазір саяси белсенділігі де өсті. Бекжан Әлімқұловтың сөзіне қарағанда, АЭС мәселесіне келгенде халық пен үкіметтің 100 пайыз түсіністігі керек. Тіпті референдум жасағаны да дұрыс. Ол үшін алғышарт ретінде көп жұмыс атқару керек.

«Ол үшін өте үлкен түсіндіру жұмыстары жүргізілуі тиіс. Халықтың ойын бері қарататын көп жұмыс атқарылуы керек. Күні ертең тұрақты энергия көзі болмаса, қалай дамимыз? Ертең жаңа үй салам десе, соның өзіне энергия көзі тапшы болып отырса, қалай болады? Қосымша энергия көздерін қоспасақ, экономиканы қалай дамытамыз? Кәсіпорындарды қалай ашамыз? Оның бәрі сұрақ. Кез келген адам түсінуі тиіс: энергетика экономиканы дамытудың ең басты құралы. Бізде энергетика неге дамымай жатыр деген сұраққа келсек, айналып келіп тарифке тірелеміз. Тарифтерді көтерейік десек, қаңтарда бағаны көтерген кезде не болғанын жақсы білесіз. Тарифті не үшін көтере алмаймыз? Өйткені халықтың әл-ауқаты төмен. Халықтың әл-ауқаты не үшін төмен? Бұл сұраққа жауап іздеген кезде біз Энергетика министрлігінен Ұлттық экономика министрлігіне өтіп кетеміз. Неге Үкімет энергокәсіпорындар өздеріне экономикалық тұрғыдан дұрыс болатын бір тариф бекітпейді? Неге жағдайы бар адамдар сол үлкен тарифпен төлемейді? Қазір бұл бағытта да әңгіме болып жатыр», - дейді Бекжан Әлімқұлов.