×
478.9
459.98
8.24
#қаңтар қақтығысы #Ресей-Украина соғысы #әкімге үш сұрақ #лот ашар #кибербуллинг #жаңа облыстар #коронавирус #hi-tech
478.9
459.98
8.24

Хиджапқа қарсы Ирандағы ереуіл: қазақстандық көзқарас

22.09.2022, 11:07
Фото: Ашық дереккөздерден

Белгілі журналист Салтай Сайранұлы Иранда бес күн бойы жалғасып жатқан билікке қарсы ереуілге қатысты желіде өзінің ойын жазды, деп хабарлайды Ulysmedia.kz.

“Иранда халықтың билікке қарсы ереуілінің жалғасып жатқанына, міне, бесінші күннен асты. Халықтың, әсіресе, әйелдердің көшеге ағылуына 22 жастағы студент қыз Махса Аминидің өлімі себеп болып отыр.

Тегеранға оқуға келген Махса Аминиді 13-қыркүйек күні метродан шығып бара жатқан жерінен полиция “орамалды талапқа сай тақпады” деген себеппен бөлімшеге алып кеткен.

Артынша қыз полиция бөлімшесінде комаға түсіп, ауруханада жан тапсырады. Халық та Махса Аминидің өліміне полицияларды кінәлап, ереуілге шығуда, әйелдер де орамалды міндеттеген билікке қарсы шаштарын қиып, орамалдарын өртеп, “Диктаторға өлім болсын!” деген ұрандармен ереуілдеуде.

Міне, бір қыздың өлімі себепті бір елдің тағдыры қыл үстінде тұр”, – деп жазды ол.

Time журналының мұқабасы

“Енді мынаған бір мән берсеңіз: бұл – 2015 жылы 16 қараша күні шыққан “Тайм” журналының мұқабасы. Мұқаба “Иран 2025: келесі он жылдықта Әлемді қалай өзгертеді” деген тақырыппен берілген. Мұқабада орамалы басынан шешілген қыз тұр. Қолында телефон. Ал саусағында жіп байланған шығыршық бар. Шығыршыққа байланған жіп те белгісіз біреулердің тарапынан тартулы тұр. Қыздың назары да жіп тартылған жақта.

Сізше, Ирандағы бүгінгі оқиғалар мен мұқабаның арасында қандайда бір байланыс бар ма? Жоқ, әлде сәйкестік пе?”, – деп жазды ол.

Одан бөлек, журналист өз жазбасында мұқабағы сурет көптеген мәнді ішіне бүгін жатқанын жазған.

“Мұқабадағы сөйлеп тұрған суреттер мына мағыналарға келетін секілді ме, қалай өзі?

1. Жіптің сырттан, белгісіз біреулердің тарапынан тартылуы – Ирандағы жүйенің, режимнің құлауына сыртқы күштердің ықпал ететіндігін меңзегендей.

2. Жіптің қыздың саусағына байлануы – бұл жоспарға әйелдер қауымын қолданатынына ишарат секілді.

3. Қыздың қолындағы шығыршық – гранатаның суырылған шығыршығындай. Яғни, Ирандағы “бүліктің бомбасын” қыздардың қолымен жаруды жоспарланғандай.

4. Қыздың басын жаппай тағылған орамал – бүліктің басталуына, наразылықтың тұтануына орамал түрткі болатындығының белгісіндей. Артынша жаулыққа (орамал) деген халықтың жаулығын (дұшпандығын) арттыру жоспары тұрғандай.

Маған мұқаба мен Ирандағы оқиғаның арасында осындай бір байланыс бардай көрінді. Сәйкестік те болуы мүмкін.

PS: Жалпы, орамалды тағуға мәжбүрлеу де, тақтырмай зорлық қылу да – дұрыс емес. Дінде нені күшке салып бассаң, оның серпілісі мен тебілу күші де қатты болады”, – деп жазды ол.