Атырау облысының билігі Жайық өзенінің қатты таяздануына және Каспий теңізі деңгейінің төмендегеніне алаңдаулы. Шенеуніктер Қазақстанның бейінді министрліктерін экологиялық апаттың алдын алу үшін себептерді зерттеуге және шұғыл шаралар қабылдауға шақырды, деп хабарлайды Ulysmedia.kz.
Атырау облысы әкімінің орынбасары Жасұлан Бисембиев бұл мәселеге қатты алаңдаушылық білдірді. Оның айтуынша, 2022 жылы Оралдың орташа көпжылдық ағынының тұрақты көлемі 9,46-дан 4,93 текше км-ге дейін, яғни екі есе азайды.
Айта кету керек, өзен Қазақстан мен Ресей аумағы арқылы ағып өтіп, Каспий теңізіне құяды.
Бисембиев өзен арнасын тереңдету қажет екенін атап өтті. Ол үшін экология және табиғи ресурстар министрлігі, сондай-ақ су ресурстары және ирригация министрлігі өзен ағысы бойынша жоғары орналасқан су айдындарынан су ағынының көлемін ұлғайту мәселелеріне ерекше назар аударуы қажет дейді ол.
- Жайықты экологиялық оңалту үшін өңірде өзен түбін тереңдету және жағалауды нығайту жұмыстары жүргізілуде. Алайда, соңғы үш жылда Жайық өзенінің арнасы таязданып кетті және қазір ол экологиялық апаттың алдында тұр, - деді шенеунік.
Ол соңғы жылдары Каспий теңізінің деңгейі 2 метрге төмендегенін, ал кейбір учаскелерде су жағадан 25-30 км-ге шегінгенін, суы тартылған жерлердің тұздану қаупі туындағанын айтты.
Айта кетейік, бұдан бұрын Атырау облысының тұрғындары әлеуметтік желілерге Жайық өзені жасыл түске боялғанын, ал жағалауда ақ көбік пайда болғанын айтып дабыл қаққан.
