Ulysmedia.kz «Qazaqgaz» ұлттық компаниясының бұрынғы басшысы болған Санжар Жаркешовтың кәсіби жолын еске түсіруді жөн көрді. Ол – қазақстандық топ-менеджерлердің ішінде шетелдік тәжірибесі отанда жұмыс істеген уақытынан асып түскен жалғыз басшы.
Тарих
Санжар Жаркешов Қазақстанға 2019 жылы оралып, бірден Экология, геология және табиғи ресурстар вице-министрі қызметіне тағайындалды. Алайда министрлікте ұзақ тұрақтамай, бір жылдан соң Украинаға аттанып, «Нафтогаз УГВ» компаниясының бас директордың орынбасары және «Барлау және өндіру» дивизионы директорының орынбасары болды. Ал 2022 жылдың ақпанында ең қиын кезеңде «ҚазахГаздың» тізгінін ұстады.
Кімді алмастырды?
Жаркешов бұл қызметке Қайрат Шәріпбаевтың орнына келді. Ол – «ескі элитаның» ықпалды өкілі, ұзақ жылдар бойы газ саласын уысында ұстап келген тұлға болатын. Қаңтар оқиғасынан кейін Шәріпбаев пен Назарбаевтар отбасымен байланысты көптеген шенеунік биліктен кетті.
Санжар Жаркешов жаңа буын менеджерлерінің өкілі ретінде қабылданып, ұлттық газ операторының беделін қалпына келтіру және Шәріпбаев кезеңінде қалыптасқан күмәнді схемаларды бұзу міндеті жүктелді. Сарапшылар оның тағайындалуын экономиканың негізгі секторларынан бірінші президент әулетінің ықпалын жою үдерісінің бір бөлігі деп бағалады.
Жаркешов – Техас университеті мен ҚазУЭФИТ түлегі, халықаралық марапаттары бар, кәсіби ортада мойындалған маман.
Газ және сандар
Оның басшылығы кезінде газдандыру қарқыны артты:
1,7 млн-нан астам адам көгілдір отынға қол жеткізді, елдің жалпы газдандырылу деңгейі 62,4%-ға жетті.
Жетісу облысының 66 ауылын газбен қамтамасыз ететін Талдықорған – Үшарал газ құбыры салынды.
Алматыда «Алматы – Байсерке – Талғар» магистральдық газ құбырының екінші желісі мен ЖЭО-2 және ЖЭО-3 үшін инфрақұрылым пайдалануға берілді.
Үш жыл ішінде Chevron компаниясымен Ақтөбе облысында геологиялық барлау жүргізу жөнінде carry-finance схемасы бойынша келісімге қол қойылды. Бұл – инвестиция тартудың маңызды үлгісі болды. Сондай-ақ CNPC және өзге серіктестермен жаңа кен орындарын барлау және игеру жобалары іске қосылды. Газ жеткізу мен транзитіне қатысты жаңа келісімдер жасалды.
Экологиялық және әлеуметтік әсері:
Алматы ЖЭО-ларын газға көшіру зиянды қалдықтарды азайтты әрі қосымша жұмыс орындарын ашты.
Инфрақұрылымға 400 млрд теңгеге жуық қаржы құйылды: осы кезеңде 112 елді мекен қосылып, 213 мыңнан астам тұрғын газбен қамтылды.
Жаркешов квазимемлекеттік сектор басшыларының ішінде қызметі жайлы әлеуметтік желіде егжей-тегжейлі есеп берген жалғыз тұлға саналады. Оның жазбаларына пікір қалдырғандар: «Өмірбаяны құрмет тудырар жалғыз адам», – деп жазады.
Жаңа қызмет
Бүгін үкіметтің қаулысымен Санжар Жаркешов энергетика вице-министрі болып тағайындалды.
Бұған дейін Ulysmedia.kz-ке берген сұқбатында ол: «Отанға оралғаныма және «Qazaqgaz-ға» келгеніме өкінбеймін. Бір жылдан сәл асатын уақытта күрделі жүйелі өзгерістерді енгізіп, реформаларды бастадық. Енді нәтижесін көріп, адал әрі кәсіби мамандарды жинап, бірге реформаларды жалғастыруды қалаймын», – деген еді.
