Алматы соты ең даулы экономикалық тартыстардың біріне нүкте қойды, деп хабарлайды Ulysmedia.kz.
ТОЛЫҒЫРАҚ
Арнайы мамандандырылған ауданаралық экономикалық сот Қазақстандағы ең ірі компаниялардың бірі – ERG акционерлері Шухрат Ибрагимов пен Патох Шодиевтің талап-арыздарын қарап, Евразиялық топтың (ERG) иелері арасындағы көпжылдық тартыста жаңа кезең бастаған шешім қабылдады.
КІМ ЖЕҢДІ
Сот Ибрагимовтың талабын қолдап, «Еуразиялық қаржы компаниясын» 2025 жылдың 2 маусымы мен 30 шілдесінде қабылданған директорлар кеңесінің шешімдерін орындауға міндеттеді. Бұл шешімдер «Еуразиялық банк» пен «Еуразиялық капиталдың» 2024 жылғы қаржылық есебін бекітуге, директорлар кеңесінің жаңа мүшелерін тағайындауға және оның жаңартылған құрамын, соның ішінде Ибрагимовтың өзін бекітуге қатысты болды.
Сот шешімі Ибрагимовтың топтың қаржылық активтерін бақылауын күшейтіп қана қоймай, оған басқаруға тікелей қол жеткізуге жол ашқанын көрсетеді. Ал Шодиев өз талабында директорлар кеңесінің шешімдерін заңсыз деп танып, акционерлердің жаңа жиналысын шақыруды талап еткен еді. Алайда сот оның талабын толықтай қанағаттандырмай, көпжылдық күресте жеңіліске ұшыратты.
ИБРАГИМОВ ПЕН ШОДИЕВ
Шухрат Ибрагимов – қазақстандық кәсіпкер, ERG-нің үлес иелерінің бірі. Соңғы жылдары ол корпоративтік қаржы ағындарының ашықтығын қолдаушы ретінде танылып, топтағы ықпалын едәуір күшейтті. Сарапшылардың пікірінше, Ибрагимов активтерді біріктіріп, акционерлер арасындағы даулы мәмілелер мен келіспеушіліктер арқылы олардың «шашырап кетуіне» жол бермеуге тырысып жүр.
Патох Шодиев – Бельгия кәсіпкері, Александр Машкевичпен серіктестіктегі ең беделді әрі тәжірибелі тұлғалардың бірі. Дегенмен, компания ішіндегі бірқатар корпоративтік қақтығыстар оның ERG-дегі ықпалын әлсіретті.
ERG ИМПЕРИЯСЫ
ERG – металлургия, энергетика, көлік және қаржылық активтерді біріктіретін өнеркәсіп алыптары. Қазақстанда топ ондаған мың жұмыс орны мен экспорттың қомақты бөлігіне жауапты кәсіпорындарды басқарады. Сондықтан акционерлер арасындағы ішкі қақтығыстар ел үшін ұлттық маңызы бар мәселеге айналады: бұл – салық түсімдерінің тұрақтылығы, энергетикалық қауіпсіздік және стратегиялық шикізат нарықтары.
Сол себепті Алматыдағы сот шешімін сарапшылар жай ғана акционерлер арасындағы тартыстың нәтижесі емес, корпорациядағы басқарудың тұрақтылығына жасалған қадам деп бағалап отыр.
БҰЛ ЖЕҢІС НЕГЕ МАҢЫЗДЫ
Ибрагимов өзін ұлттық мүдделердің қорғаушысы ретінде көрсетіп, қаржылық ашықтықты талап етеді және ERG активтері Қазақстанға жұмыс істеуі тиіс деп есептейді. Қазірдің өзінде іске асқан жобалар топтың жаңа кезеңге аяқ басқанын айғақтайды.
АЛДАҒЫ ҚАДАМДАР
Формалды түрде тараптардың бір ай ішінде апелляцияға беру құқығы сақталған. Бірақ қазірдің өзінде сот шешімі Ибрагимовтың позициясын күшейтіп, Шодиевтің ықпалын әлсіреткені анық. Сарапшылар бұл – ERG-де ауқымды қайта құрылымдаудың алғашқы қадамы болуы мүмкін екенін жоққа шығармайды.
Акционерлер арасындағы тартыс әлі толық аяқталмағанымен, дәл қазір Ибрагимов империяны басқаруда шешуші рөлге ие. Еске сала кетейік, тамыз айында ERG Қазақстан бюджетіне 365 млн АҚШ доллары көлемінде рекордтық дивиденд аударған болатын. Бұл сома компанияның 2013 жылы Лондон биржасынан кеткеннен бергі ең ірі төлемі болды.
ERG-ДЕГІ ӨЗГЕРІСТЕР
Соңғы екі жылда ERG өндіріс пен қайта өңдеу саласында берік орын алғанын көрсетті – «Болашақ» шахтасы іске қосылды, жел электр станциялары салынды, қалдықтарды өңдеу кешені ашылды, терең өңдеу технологиялары енгізілді, галлий өндіруді қоса алғанда, стратегиялық материалдар бойынша ірі жоба басталды. Сонымен қатар, екі жарым жыл ішінде үш мектеп салынды.
