Сенат төрағасы Мәулен Әшімбаев Қазақстан президентін мерзімінен бұрын сайлау жайлы сұраққа жауап беріп, мұндай әңгімелерді провокация деп атады, деп хабарлайды Ulysmedia.kz.
МЕРЗІМІНЕН ТЫС САЙЛАУ БОЛА МА
Ulysmedia.kz тілшісі Мәулен Әшімбаевтен мұндай әңгімелер қоғамда бірнеше рет талқыланғанын ескере отырып, мерзімінен бұрын сайлау болуы мүмкін бе деп сұрады.
– Менің ойымша, мерзімінен бұрын сайлау жайлы мұндай әңгімелер белгілі бір мақсатты көздегеннен басталып, қандай да бір мақсатта талқыланады. Бәлкім, қандай да бір мүдделерге байланысты кейбір мақсаттарды көздеп қозғалуы мүмкін. Әйтпесе, оған еш негіз жоқ, - деді Сенат спикері.
ТОҚАЕВТЫҢ ТАПСЫРМАСЫ ЖАЙЛЫ
Әшімбаев президент Қасым-Жомарт Тоқаевтың Үкімет пен Қазақстан халқы алдындағы нақты міндеттерді белгілегенін еске салды.
– Біз экономиканы дамытып, тұрақты әрі сапалы экономикалық өсімді қамтамасыз етуіміз керек. Міндеттер қойылды. Қазір мемлекеттік басқарудың тиімділігін арттыру шаралары жалғасып жатыр. Институттарды, билік тармақтарын, сот жүйесін дамыту тұрғысынан үлкен жұмыс атқарылуда. Сондықтан, бүгін де нақты міндеттер бар және баршамызға президентіміздің барлық тапсырмалары мен бағдарламаларын сапалы орындау қажет. Енді бағдарламаларды қалай жүзеге асыру керектігін ойлану керек, - деді ол.
Мәулен Әшімбаевтің айтуынша, Қазақстан президентін мерзімінен бұрын сайлау туралы әңгіме спекуляция пен инсинуация саналады.
– Мұндай әңгімені кімдер қозғайтынын білу маған қиын. Менің ойымша, әдейі осындай әңгімелер қозғалып, негізгі күн тәртібінен алшақтатқысы келеді. Біздің міндетіміз – адамдардың өмір сүру деңгейін арттыру. Сондықтан, менің ойымша, сіз инсинуацияны таратпай, біздің қоғамымыз үшін нәтижесіз пікірталастарға тосқауыл қоюыңыз керек. Біз осындай әңгіме аясында негізгі мәселелерден алшақтаймыз. Теңге бағамының тұрақтылығын қалай қамтамасыз етуге болады? Демократияландыруды қалай жалғастыру керек? Азаматтық қоғамды одан әрі қалай дамытуға болады? Гендерлік тепе-теңдікті қалай қамтамасыз етуге болады? Біз осы мәселелерге назар аударуымыз керек", - деді Әшімбаев.
ЕСКІ ҚАЗАҚСТАН БА
Журналистер Сенат спикерінен "Ескі Қазақстанның өкілдері осындай тақырыптарды қозғауы мүмкін бе?" сұраған. Әшімбаев "уақыт көрсетеді" деп екіұшты жауап берді.
