Қазақстан Республикасы Үкіметінің қаулысымен Санжар Жаркешов энергетика вице-министрі қызметіне тағайындалды, деп хабарлайды Ulysmedia.kz.
Бүгін Әлібек Жамауов QazaqGaz ұлттық компаниясының басқарма төрағасы болып тағайындалғаны белгілі болды. Ол бұл қызметте Санжар Жаркешовтың орнына келді.
Санжар Жаркешов туралы
Айта кетейік, 2025 жылдың наурыз айында Санжар Жаркешовты энергетика министрі қызметіне тағайындалады деген болжамдар болған.
Ол Қазақ экономика, қаржы және халықаралық сауда университетін, сондай-ақ АҚШ-тың Техас университетін «Мұнай-газ инжинирингі» мамандығы бойынша тәмамдаған.
Жаркешовтың шетелде жұмыс тәжірибесі мол:
мансабын АҚШ-тағы Техас мұнай-газ және геожүйелер инжинирингі орталығында зерттеуші-инженер болып бастаған;
кейін ExxonMobil корпорациясында Калифорния, Колорадо және Техас штаттарында бұрғылау инженері қызметін атқарған;
2016–2018 жылдары Шотландиядағы Merlin ERD компаниясында өндірістік супервайзерлердің жетекшісі және бас бұрғылау инженері болды;
одан соң Лондондағы McKinsey and Company кеңсесінде мұнай-газ саласының сарапшысы ретінде жұмыс істеп, Колумбия, Оман, Ресей, АҚШ-тың Аляска штаты және Ұлыбританиядағы жобаларға қатысқан.
2022 жылға дейін Жаркешов Украина ұлттық мұнай-газ компаниясы «Нафтогаз» құрамындағы «Барлау және Өндіру» дивизионы директорының орынбасары қызметін атқарды.
