Экология, геология және табиғи ресурстар министрі Серікқали Брекешев бүгін үкімет қабырғасында журналистерден ренжіп қайтқан секілді. Ондаған журналистің ортасында тілшілердің бірінен кейін бірінің сұрағына жауап беруге тырысқан. Бір рет «қашып» кетіп, қайта кулуарға оралған министрдің соңынан утилизациялық алым туралы сұрақ қалар емес, деп хабарлайды Ulysmedia.kz.
Алдымен министрге Ulysmedia.kz тілшісі сұрақ қойған.
«Экологиялық кодекске сәйкес, утильалымнан түсетін ақша қоршаған ортаны жақсартуға және өңдеу өнеркәсібін дамытуға бөлінуі керек. Ал РОП-тың 300 млрд теңгесінің 100 млрд теңгесі жеңілдетілген автонесиелендіруге бөлініп кетті. Автонесиелендіру – өңдеу өнеркәсібіне жатпайды. Қоршаған ортаны да жақсартпайды. Сіз осы жағдайдың өзі Экологиялық кодекске қайшы келетінін білесіз бе?» - деген сұрақ қойылды.
Бұл сұраққа жауап берген министр «бәрі заңға сәйкес» деді.
«Бәрі нормально. Қазір утильтөлем жүйесі Жасыл даму компаниясына қабылданып жатыр. Бұрынғы алып келген автокөліктер жаңа ставкамен утильсбор төлей береді (?)» - деп екіұшты жауап берді министр.
Министрге бұл сұрақты портал тілшісі екінші қайтара қойды.
«Заңды», - деді ол.
«Нақты қай заңның қай бабына сай келеді?» - деп сұралды министрден.
«Ешқандай ол жағынан проблема жоқ. Үкіметтің қаулысы шықты», - деді Брекешов.
«Сіз өзіңіз осы бұйрыққа қол қойдыңыз ба?» - деген сұраққа министр «иә, өзім қойдым» деді ол.
Журналистер «жалпы утилизациялық алымды алып тастау керек деп санамайсыз ба?» деп министрден бірнеше рет сұраған. Алайда Брекешов ондай ұсыныс түссе қарастыратынын айтты. Нақты позициясын білдірген жоқ. Министрдің терлеп кеткенін де байқалды. Алайда көп сұрақ жауапсыз қалды.
