×
460.95
487.18
8.66
#қаңтар қақтығысы #Ресей-Украина соғысы #әкімге үш сұрақ #лот ашар #кибербуллинг #жаңа облыстар #коронавирус #hi-tech
460.95
487.18
8.66

Президент Ерлан Қаринді мемлекеттік кеңесші лауазымына тағайындады

14.06.2022, 19:48

Қазақстанда мемлекеттік хатшы лауазымы жойылды. Оның орнына мемлекеттік кеңесші деген жаңа лауазым пайда болды. Президент Қасым-Жомарт Тоқаев осындай жарлық шығарып, Ерлан Қариннің лауазымын өзгертті, деп хабарлайды Ulysmedia.kz.

Мемлекет басшысының жарлығына сәйкес Ерлан Қарин Қазақстанның мемлекеттік кеңесшісі лауазымына тағайындалды. Ол бұған дейін мемлекеттік хатшы лауазымын атқарған. Енді Қазақстанда бұдан былай мемлекеттік хатшы деген лауазым болмайды.

Мемлекеттік кеңесші:

  • президенттің тағайындауымен осы қызметке келеді және оның шешімімен босатылады, тек президентке есеп береді және соның бақылауында болады;
  • ішкі саясат саласында президентке стратегиялық ұсыныстар әзірлейді;
  • президент атынан парламентпен, мемлекеттік органдармен, саяси партиялармен және қоғамдық бірлестіктермен қарым-қатынаста, сондай-ақ халықаралық қатынастарда өкілдік етеді;
  • әлеуметтік-гуманитарлық саланың: білім, ғылым, мәдениет және спорт мәселелері бойынша қызметті үйлестіреді;
  • құзыретіне кіретін мәселелер бойынша орталық және жергілікті атқарушы органдарға бұйрықтар шығарады, тапсырмалар береді.

Ақорда таратқан ақпаратқа сәйкес, мемлекеттік кеңесші өкімдер шығаруға, өзінің құзыретіне кіретін мәселелер бойынша орталық және жергілікті атқарушы органдарға тапсырмалар беруге құқылы. Ол сонымен бірге үкіметтің, мемлекет басшысының жанындағы консультативтік-кеңесші органдардың отырыстарына қатысуға, өзінің құзыретіне кіретін мәселелер бойынша мемлекеттік органдар мен лауазымды адамдардан қажетті ақпаратты, құжаттар мен басқа да материалдарды сұратуға және алуға, өз құзыретіне кіретін мәселелер бойынша президент актілерінің жобаларын әзірлеу, сондай-ақ Мемлекет басшысы алға қойған өзге де міндеттерді шешу үшін ведомствоаралық жұмыс топтарын құруға құқылы.

Ерлан Қарин 1976 жылы Түркістан облысының Сайрам ауданындағы Ақсу ауылында өмірге келген. Мемлекет және қоғам қайраткері, саясаттанушы. Саясаттану ғылымдарының кандидаты. Президент кеңесшісі қызметіне тағайындалғанға дейін «Қазақстан» арнасының басқарма төрағасы болған (2017 жылдан бастап).

1997 жылы тарих мамандығы бойынша Жұбанов атындағы Ақтөбе мемлекеттік университетін, 1999 жылы әл-Фараби атындағы ҚазҰУ-нің философия және саясаттану факультетін тәмамдаған. Еңбек жолын орта мектепте тарих және география пәндерінің мұғалімі болып бастады. Қазақстанның даму институтының Саяси зерттеулер орталығында қызметкер, Ресей және Қытай институтының директорының орынбасары, Орталық Азия саяси зерттеулер агенттігінің директоры, Маңғыстау облысының әкімінің кеңесшісі қызметтерін атқарған.

2008 жылдың ақпан айында Нұрсұлтан Назарбаевтың жарлығымен президент әкімшілігі ішкі саясат бөлімінің меңгерушісі болды. 2019 жылдың сәуір айында мемлекет басшысының кеңесшісі, 2020 жылдың шілдесінен 2022 жылдың қаңтарына дейін президенттің көмекшісі атанды. 2022 жылдың 5 қаңтарында ҚР мемлекеттік хатшысы болып тағайындалды.