Алматылық «Қайрат» футбол клубы тарихта алғаш рет Чемпиондар лигасына жолдама алды. Бұл сенсациядан әлі естерін жия алмай жүрген жанкүйерлерге тағы бір жаңалық жетті – команда қарсыластарының бірі мадридтік «Реал» болды. Енді футбол жайлы әңгіме бұрын спортқа қызықпағандарды да шарпыды. Ulysmedia тілшісі белгілі спорт комментаторы Ербол Қайровтан алдағы ойынға қатысты ойын сұрады.
- «Қайрат» алғаш рет Чемпиондар лигасында ойнамақ. Команданың бұл деңгейге шығуы мен «Реалға» қарсы алдағы ойынның маңызы қандай?
- Шын мәнінде, «Қайрат» Чемпиондар лигасының топтық кезеңіне баяғыда-ақ лайық болатын. Бірақ командаға еурокубоктарда әрдайым жолы түсе бермеді. Көп нәрсе жеребеге байланысты. «Қайраттың» елдегі ең үздік академиясы бар, олар футболшыларды «Челси» мен «Зенитке» сәтті сатып жүр, ал Қазақстан құрамаларының негізгі ойыншылары – Алматының тәрбиеленушілері. «Реалға» келсек, мен бұған бөлек назар аудармаушы едім. «Қайрат» сегіз матч ойнайды, олардың әрқайсысына бүкіл Еуропа көз тігеді. Иә, «Реал» – көптен күткен қарсылас, бірақ әңгіме «мадридтіктерді кім көреді, кім көрмейді» дегенге тірелмеуі тиіс.
«Реал» төңірегінде тым көп әңгіме болып жатыр. Ал бізге кезінде Германия, Англия, Бельгия, Португалияның үздік құрамалары келген. Олардың сапында қазіргі «Реалда» ойнап жүргендерден кем түспейтін жұлдыздар болған. Біз әлі де үшінші әлем елі емеспіз дегенге үйренетін уақыт келді. Бұл жаққа эстрада, кино, спорт жұлдыздары келіп жүр. Дәл сол сияқты «Реал» да Азиядағы бірқатар елдерге турне жасап барған, Чемпиондар лигасы аясында Молдоваға да келген. Футбол – халықаралық ойын, ерте ме, кеш пе «Реал» мұнда келетін еді. «Челси» мен «Манчестер Юнайтед» соның дәлелі.
- Сіздің болжамыңыз бойынша, «Қайрат» пен «Реал» қандай құраммен ойнайды? Әлеуметтік желілерде кейбірі Мбаппе келеді десе, енді бірі негізгі құрам емес дейді.
- Бәрі «Қайрат» пен «Реалдың» қай турда кездесетініне байланысты. Егер алғашқы матчтарда ойнаса, мадридтіктер міндетті түрде негізгі құрамын шығармақ, өйткені плей-оффқа шығу мәселесін шешу керек. Өткен жылы «Реал» плей-оффқа зорға өтті. Егер 6–8-турда кездессе, Хаби Алонсо жартылай резервті құрамды шығаруы мүмкін. Бірақ олардың әр позициясында жұлдыздар ойнайды. Ал «Қайратқа» келсек, ол туралы даулы ештеңе жоқ. Олар ең мықты құрамымен ойнайды, ал футболшылар дайындықта бар күшін салып, өз мүмкіндігін пайдалануға тырысады.
- Сіздің ойыңызша, Алматының Орталық стадионы мұндай ойынға дайын ба?
- Шындығында, мұндай атақты клубты ескі әрі шағын стадионда қабылдау – ұят.
- Әзербайжанда көршілеріміздің стадионы 70 мың адамға арналған, Қырғызстан 50 мыңнан астам көрерменге лайық жаңа арена салып жатыр. Ал біз бір ғана жасанды төсеніш төселіген «Астана Аренаға» қанағат етіп отырмыз. Алматыда әлдеқашан 50-60 мың көрерменге арналған жаңа стадион салынуға тиіс еді. Бұл – елдің абыройы, шетелдік инвестиция, туризмнің дамуы. Бірақ Алматы әкімдігі көрсетіп жүрген жобаларға аса сене бермеймін. Жаңа ареналардың макетін жылдар бойы ұсынып келеді, алайда жағдай орнынан жылжыған жоқ.
- Билеттердің бағасы қандай болады деп ойлайсыз? Жанкүйерлер алдын ала қанша ақша дайындауы керек?
- Бағалар 15-20 мың теңгеден басталады деп ойлаймын. Ал билеттер делдалдардың қолына түскен соң, құны 70-100 мың теңгеге дейін шарықтайды.
- Сөз соңында – матчқа кәсіби болжамыңыз қандай?
- «Қайрат» «Реалға» лайықты қарсылық көрсетеді. Тең түскенін қалар едім, бірақ мадридтіктердің шағын командаларға қарсы қалай ойнайтынын білемін. Сенсация болу мүмкіндігі өте төмен. «Шерифке» «Бернабеуде» жеңу бақыты бұйырды. «Қайратқа» да барын салып, аянбай күресу қажет.
Контекст
Еске салайық, алматылық «Қайрат» Чемпиондар лигасына жолдама алу үшін ауыр кезеңнен өтті. Іріктеу кезеңінде команда словениялық «Олимпияны» (қос матч қорытындысы – 3:1), финнің КуПС-ын (3:2) тізе бүктірді, кейін драмалық пенальти сериясында словакиялық «Слованды» жеңді (1:1, пенальти – 4:3).
Кульминациясы – плей-оффтағы шотландиялық «Селтикке» қарсы өткен кездесу (0:0, пенальти – 3:2). Бұл ойында қақпашы Темірлан Анарбеков үш бірдей соққыны қатар қайтарып, «халық қаһарманына» айналды. Оның Instagram-дағы жазылушылары бір тәулікте 100 мыңнан астам адамға өсті.
2025/26 жылғы Чемпиондар лигасының жеребесі 28 тамызда Монакода тартылды. «Қайрат» төртінші себетке түсті. Алматыда команда мадридтік «Реалды», бельгиялық «Брюггені», гректің «Олимпиакосын» және кипрлік «Пафосты» қабылдайды. Ал сырт алаңда миландық «Интермен», лондондық «Арсеналмен», лиссабондық «Спортингпен» және даттың «Копенгагенімен» ойнайды.
Матчтардың уақыты мен күні 30 тамыз, сенбіде белгілі болады. Турнирдің басталуы – 16 қыркүйек.
