Фристайлдан жасөспірімдер арасындағы Әлем чемпионаты Қазақстан үшін тарихи оқиға болды. 19 жастағы Дінмұхаммед Райымқұлов «шаңғы акробатикасы» бойынша Қазақстанға фристайлдан екінші алтын медаль алып келді, деп хабарлайды Ulysmedia.kz.
Финалдық сында Райымқұлов 104,52 балл жинап, осы біріншіліктің шаңғы акробатикасы бағыты бойынша Қазақстан тарихындағы алғашқы жеңіске қол жеткізді.
Бұл нәтиже фристайл-шаңғы акробатикасынан ұлттық құраманың кәсібилігі мен бірлескен жұмысын көрсетеді. Бұл медаль Қазақстандағы фристайлдың дамуына маңызды қадам болмақ.
Райымқұлов Дінмұхаммед – халықаралық класстағы спорт шебері. 2022 жылы Еуропа Кубогы кезеңінде 1-орын алған. Қазіргі уақытта Әлем Кубогының жалпы рейтингінде 30-орында тұр.
Еске сала кетсек, Қазақстан жасөспірімдер арасындағы әлем чемпионатында тарихи нәтижеге қол жеткізді.
Сондай-ақ фристайл-могулдан Ұлттық құрама барлық жарыс күні жүлдеге қол жеткізді. Атап айтқанда, әлем біріншілігінің алғашқы күнінде Анастасия Городко жекелей сында 2-орын алса, ертесіне параллель могулда алтыннан алқа тақты. Ал аралас командалық сайыста былтыр IV қысқы жасөспірімдер Олимпиадасына қатысқан Юлия Фиклистова мен Денис Раструба жұбы күміс жүлдегер атанды.
