Қазақстандықтардың несие жүктемесінің артуы, микроқаржы ұйымдарының (МҚҰ) жауапкершілігі және коллекторлармен қарым-қатынас – бұл күннің ең өткір мәселелерінің бірі. Біздің қаржылық сауаттылықты арттыруға арналған ағартушылық жобамыздың кезекті шығарылымы дәл осы күрделі тақырыптарға арналады.
Көп азамат қаржылық қиындықтан шығу үшін «жылдам ақша» ұсынатын МҚҰ мен ломбардтарға жүгінеді. Алайда, бір қарызды жабамын деп, екіншісіне кіріп, ақыры «қарыз қақпанына» қалай түскенін байқамай қалатындар аз емес. Ал берешекті қайтару кезінде коллекторлардың дөрекілігі мен заңсыз қысымына тап болғанда, қарапайым халық кімнен көмек сұрарын білмей жатады.
Мемлекет тарапынан қандай қорғау бар? Қаржы реттеушісі халықты шамадан тыс несиеленуден қалай сақтайды? Бұл сұрақтарға жауап алу үшін студиямызға құзырлы орган өкілдерін арнайы шақырдық.
Подкаст спикері Назар Қалибек – Банктік емес ұйымдарды реттеу департаментінің бас маманы.
Подкаст барысында қазіргі таңдағы ең өзекті сұрақ – халықтың шамадан тыс несиесі талқыланды. Спикер азаматтардың бір уақытта бірнеше жерден (банк, МҚҰ) қарыз алуының себептері мен салдарына тоқталды.
Қаржылық сауаттылық – сіздің және отбасыңыздың қаржы қауіпсіздігінің кепілі. Өз құқығыңызды біліп, қаржылық қателіктерден сақтанғыңыз келсе, сарапшылардың пікірін тыңдауға кеңес береміз.
Толық шығарылымды Ulysmedia YouTube арнасынан көріңіздер.
