Қаржы мониторингі агенттігі Семейдегі үш қазандыққа 67 миллион теңге шығын келтірілгенін анықтады, деп хабарлайды Ulysmedia.kz Қаржы мониторингі агенттігіне сілтеме жасап.
Жылыту проблемалары
2022 жылы қаладағы қазандықтарды жөндеуге бюджеттен ақша бөлінген болатын. Алайда 1934 жылы пайдалануға беріліп, әбден тозығы жеткен жылу орталығынан әлі күнге дейін қыс мезгілінде ақаулар анықталып жатады. Сәйкесінше, жылу энергиясын үлестіруде проблемалар бар.
Мамандардың айтуынша, жылу беру маусымында жылу энергиясын таратуда орташа есеппен тәулігіне үшке жуық кідіріс орын алады екен.
Қалада бір жылу электр орталығы, 17 қазандық және 72 жылу бекеті бар.
Жылыту бойынша дәл осындай проблемалар Аягөз және Курчатов қалаларында да тіркелген, мұнда жылу желілерінің орташа тозуы сәйкесінше 53% және 35% құрайды.
Тергеу және тексерулер
Заңсыз иемдену немесе жымқыру, яғни өзгенің мүлкін жымқырды деген күдікпен мердігер компания директорына қатысты сотқа дейінгі тергеу амалдары жүргізілуде.
Қылмыстық іс шеңберінде аталған ұйым 1,2 млрд теңгеге жөндеу жұмыстарын жүргізген 14 жылумен қамту нысанында тексерулер басталды.
Сотқа дейінгі тергеп-тексеру және тергеу әрекеттері тіркелгеннен кейін мердігер Шүлбі кентіндегі қазандықта «жаңа, бірақ қолданыста болған құрылғы» деген желеумен өткен жылы орнатылған қазандықтың экономайзерін 32 миллион теңгеге ауыстырып, іске қосқан.
«Нәтижесінде 1,3 мыңнан астам жылу беру абоненттерінің құқығы қорғалды. Сегіз бюджеттік мекеме, төрт әлеуметтік нысан, 24 коммуналдық кәсіпорын жылу жүйесіне қосылған», – делінген хабарламада.
Оралхан ҚОЖАНОВ
