Павлодар соты бильярд клубының тұрағында оқ атқан полиция подполковнигіне қатысты қылмыстық іс бойынша үкім шығарды, деп хабарлайды Ulysmedia.kz.
Павлодар қалалық №2 сотының баспасөз қызметі 6 наурызда сот ІІД Қылмыстық іздестіру басқармасының оқу орталығының кадр саясаты бөлімінің бастығына қатысты бұзақылық қылмыстық іс бойынша үкім шығарғанын мәлімдеді.
2023 жылдың қаңтарында сотталушы Павлодар қаласының Сұрағанов көшесіндегі бильярд клубының алдындағы көлік тұрағында оқ атқан. Полиция қызметкері екі адаммен жанжалдасып, оларды қорқыту үшін жарқылы мен газ патрондары бар газ тапаншасынан бірнеше рет оқ атқан. Полиция подполковнигінің қарсыластары шегінді, осы кезде ол тұрақтан шығып кетті, – делінген хабарламада.
Оқи отырыңыз: «Қыз зорлаған»: бұрынғы полиция бастығы сот залынан ауруханаға жеткізілді
Сот полиция қызметкерінің жасаған қылмысы ауыр қылмыс санатына жатқызылғанын атап өтті. Полиция подполковнигінің кінәсі куәлар мен жәбірленушілердің айғақтарымен, сараптамалық деректермен расталды.
Сот полиция қызметкерін кінәлі деп танып, жауаптылықты жеңілдететін және ауырлататын мән-жайларды ескере отырып, үш жыл мерзімге бас бостандығын шектеу жазасын тағайындады. Сондай-ақ ол полиция подполковнигі шенінен айырылды. Үкім әлі заңды күшіне енген жоқ, – деді сот баспасөз қызметі.
