2020 жылдан бері Алматыда Bazis Construction компаниясы жаңа «Қалқаман» метро станциясының құрылысын жүргізіп келеді. Алайда станция құрылысының құны айтарлықтай өсіп, пайдалануға беру мерзімі едәуір кешіктірілген, деп хабарлайды Ulysmedia.kz.
МӘН-ЖАЙ
Бұған дейін қоғам белсендісі Санжар Бокаев Bazis Construction компаниясының метро салу тәжірибесі жоқ екенін және толық метрокұрылыстық жабдықпен қамтамасыз етілмегенін айтқан. Осы себептен құрылыс компаниясы жұмысты белгіленген мерзімде аяқтай алмай жатуы мүмкін. Белгілі болғандай, осы жылдар бойы Алматыда метро құрылысына қажет заманауи жабдықтар болған, бірақ олар пайдаланылмаған.
«ГиперБорей» арнасында Санжар Бокаев қазіргі таңда жұмыс істеп тұрған Алматы метросының 11 станциясын салуға қолданылған тоннель қазатын қалқандар мен арнайы жабдықтардың кешенін көрсеткен.
ҚҰРЫЛЫС ТОҚТАП ТҰР
Метро құрылысына аса қажет жабдықтардың не себепті бос тұрып жатқаны және неге тоннель қазу жұмыстарын еліміздегі жалғыз мамандандырылған компания – «АлматыМетроҚұрылыс» емес, қарапайым құрылыс компаниясы атқарып жатқаны әзірге белгісіз. Бұл компания Алматы метросының барлық 11 станциясын салған еді. Осыған байланысты редакция Алматы қаласының әкімдігіне ресми сұрау жолдайды.
