Ақтөбеде облыс әкімдігі алдына 54 фермер жиналды. Олар өздерінің шоттарына, жылжымалы және жылжымайтын мүлкіне, сондай-ақ малына тыйым салынғанын мәлімдеді, деп хабарлайды Ulysmedia.kz.
ТОЛЫҒЫРАҚ
Ақтөбеде Байғанин ауданындағы 54 шаруа қожалығының өкілдері билікке мүліктеріне салынған тыйым мен елден шығуға шектеу қою жөнінде шағымданды. Фермерлердің айтуынша, бұғатталғандар қатарында олардың банктік шоттары, жылжымайтын мүлкі, көліктері және тіпті малы да бар. Мұндай жағдайға «Қамқор» несиелік серіктестігімен әріптестік себеп болған – шаруалар осы ұйым арқылы Аграрлық несие корпорациясы қаржыландырған қарыздарды алған.
ҚАРЫЗ ӨТЕЛГЕН
“Жексенбі” шаруа қожалығының жетекшісі Қамбарбай Әжіғұловтың айтуынша, кәсіпорын 2016 жылы 6 млн теңге көлемінде несие алып, 2020 жылы толық өтеген. Соған қарамастан, оның мүлкіне қойылған тыйым әлі алынбаған.
– Мен «Қамқорға» да, «Аграрлық несие корпорациясына» да ештеңе қарыз емеспін, бірақ қаладағы пәтерім әлі де арестте тұр, – дейді фермер.
Арасында несие алмағандар да бар. Миялы ауылының тұрғыны Мырзабай Бабасов шотынан заңсыз түрде 13 млн теңге алынғанын айтты.
– Бізден заңсыз 57 млн теңге ұстаған. Менің шотымнан 13 млн теңге шешіп алған. Мен ешқашан «Қамқордың» құрамында болған емеспін, өтініш те бермедім, келісімшартқа да қол қойған жоқпын. Соңғы рет тіркеуден өтпегенмін. Мұның бәрі менің білмегенімде жасалған. Мен сияқты тағы бірнеше адам бар, – деді ол.
СОТ ДАУЛАРЫ
Фермерлер барлық инстанцияға жүгінгенімен, соттар бұған дейін несие серіктестігінің жағына шыққан. Осыдан кейін шаруалар кассациялық сотқа шағым түсіріп, ол олардың талаптарын ішінара қолдап, нақты несие алмағандардың пайдасына шешім шығарды. Аграрлық несие корпорациясы «Қамқор» ЖШС екі жылға дейінгі мерзімде төлемдерде кешігуге жол бергенін, сондықтан корпорация қарыздарды өндіру туралы талап арыз бергенін түсіндірді. Қазір сот шешіміне шағым түсіріліп, іс апелляцияға қайта жолданған. Кассациялық шешім шыққаннан кейін корпорация несие міндеттемесі болмаған қатысушыларға ақшасын қайтарып беруге уәде етті. Сондай-ақ Аграрлық несие корпорациясы «Қамқор» компаниясымен енді жұмыс істемейтінін және фермерлерге қаржыландыру үшін тікелей өздеріне жүгінуді ұсынатынын атап өтті, деп жазады «Жетінші арна».
